Eda Budić | Materinstvo

Ot svojeh kosti i žil

vadiš i guliš najbolje semen.

Čudiš se da je bolje

nego ča pensaš da more bit.

Hraniš ga i braniš

putiš i vadiš

oholiš se kako kreši i jača.

Znaš da prihaje ura

za preseć žile i korienje,

provievaš to ča kašneje storit

ač znaš da će bolet i krvarit.

Ne moreš čekat za vajk.

Već će škode mlademu forcemu drievu

bit ča već čekaš.

Svoj hlad i forco širiš i rihtaš

najveć za prontat mesto

za liečit i upočinut

i šperaš se da će tako bit

do kat bude rabilo.

________________________________

guliš-čupaš

semen-sjeme

pensaš-misliš

putiš-savjetuješ

vadiš-učiš

kreši-raste

prihaja-dolazi

provievaš-pokušavaš

storit-napraviti

vajk-uvijek

škoda-šteta

forcemu-jakom

drievu-drvu

šperaš-nadaš

rabilo-trebalo