Kolumne

subota, 11. ožujka 2017.

Božica Jelušić | Pozdrav protuletju


Autor fotografije: Ivan Nivan

Protuletje, kam si skrilo cvetje?
Kaj zdenjavu pušlaš nam pod skute?
Več smo v škrinju skrili vse kapute,
Zimske škornje hitili smo v smetje.

Z orejima pogača se mesi,
Snehe zvlače bluze i svilnaše.
Za Vuzem se nov fertun opaše,
Pak se dvaput v dnevu ide k meši.

Nedaj krtu da ledinu zruje,
Nego nam se v stekelcu nasmehni!
Pod rascvelom breskvom z vetrom brehni,
Vre posluhni kak košnice bruje!

Nemremo se dočekati trave,
Gdi dremavci rišu svetlu prugu.
Ti poskoči, mladi srnjak v lugu,
I škriljaka bači hiti z glave!

Gda se vrbe pri Dravi obnove,
Čaplja zleti, kak je belo pismo!
Božji kukci sud po zemlji mi smo,
Srečna deca, koja Sunce love!

Nema komentara :

Objavi komentar