Eda Budić | Rože

moja mat u plasteniku prebire

najlepče krizanteme

balote vele žute i biele

dvie četire deset

pun sić,dva

zgojene z velen trudon i željon

poć ćeju do našeh

ki nas čekaju na drugen kraju

moja mat broji

da ne bi kega zabila

da ki ne bi zusta prez rož i svetla

kat svakidanje krunice nisu dosti

u vrtu su znale cvast

dalije i gladiole sveh kolori

jasmin bi se na dugo ćuti

ja bin u boške brala

visibabe i čiklamini

bilo hi je čuda

kako bieli i škuro rozasti taped

margaritice one diblje

su bile po svud naokolo

po vrtu su rasli busi

ki su cvali leta i leta

šiškali su se za buketi

moja mat bi tela kolori mirisi

rože veće manje više niže

za sveh nas

ki smo tu

i za onisti ki su tamo

____________________________________________

balote- lopte,
sić- kanta,
zustat- ostati,
rože- cvijeće,
ćutit- osjećati,
boška- šuma,
bus- grm,
šiškat- šišati,
tet-htjeti