Maja Cverk | Pri kapuri

Vu  tihoči spred cintora

pritišjena z jezer let,

spod lazura mirno gledi

kapura vu živi svet. 

Zajna štacija živlenja 

čaka svoje putnike

terima se sim ne pašči.

Senak, fsaki jemput de.

Dan za danom furt jednako

pri kapuri čuh mrzline. 

Grenki kelih tu se spije -

- pe živlenje vu nigdine.

I zmerom samina drmi, 

im družba su - mrtvi svati

tere na put vekivečni, 

sprevot z javkalinkom prati.

Samo v nočnoj kesni vuri

ober krova mesec bel,

na kameni oder pazi

gde počivle  kadaver.

Strplivo črez oblok luče,

čas primekne svoju sveču

i zaspalomu osvetli

zajdni san - na ovem svetu.

_______________________________________

Manje poznate riječi:

kadaver – mrtvac, leš

javkalinka – pjesma naricaljka

sprevot – pogreb

zmerom – stalno

grenki kelih – gorki kalež

čuh mrzline – osjećaj hladnoće

štacija živlenja – stanica života

cintor– groblje

kapura – mrtvačnica

spod lazura – ispod plavetnila