Irena Matijević | Težak

 

Ko je težak?

Čovik kojen život ni lak.

On kopa, ore, sije, sadi

Po vas božji dan u poju radi.

Lozu i maslinu riže,

Nove gomile podiže,

Stare razvalije

Da šaku nove zemje dobije.

Motikon vrtle okopaje,

Oko loze trazi,

Za nove loze usadit

Zemju pripuje,

Na kućice, u fošalu

Po suncu, vitru i meštralu.

Ruke su mu pune žujih

Od lavurih, svojih i tujih.

Jedni drugiman ruku dajedu

I nikad dužni ne ostajedu.

I moj otac je bi težak.

Ko zna koliko je vagunih zemje iskopa, prikopa i okopa.

Koliko je levande pože,

Koliko maslin obra,

Kolko grozdih otrga,

Koliko putih mrižu poteza,

Krpi je i armava,

Vršvu baci i diga,

Odmete za ugore i zubatce baci,

Brod porini i navuka,

Od truda jedva hodi,

Ribu doma donosi.

Nikad ni reka da mu je teško,

Nikad se na ništa ni požali.

Njegovih ruk je dilo,

Sve ča imamo ili smo imali.

Danas rušimo ono ča je on ugradi,

Ostarilo je i već nan ni lipo.

Ugradit ćemo novo,

Lipje i boje,

Ali ja ću uvik znat

Da su temeje učinile ruke njegove.

___________________________________________________

NAPOMENA:

težak - poljoprivrednik; vas - cijeli; poje - polje; riže - reže; pripuvat - duboko iskopati; meštral - maestral; gomila - zid od kamenja; traziti - otkopavati zemlju oko nečega; kućice - stogovi zemlje; fošal - razmak između dva stoga zemlje; žuj - žulj; lavur - posao; tuji - tuđi; vagun - 10 m3; pože - požanjao; otrgati - ubrati; mriža - mreža; krpiti - raditi zakrpe; vršva - vrša za ribu; odmet - vrsta udice; trud - umor; dilo - djelo; lipje - ljepše; boje - bolje; temeji - temelji; učinile - napravile;