Kolumne

subota, 1. listopada 2022.

Aleksandar Horvat | Kaj bi mogli hudi ljudi



Hudi ljudi, kak na normu, flučkaju po semu.
Gondraju po svetu, hižam, vulicam, dvorišču.
Tuđemu živlenju navek svoju meru zemu,
Za jamranje frajsko mesto od jutra si išču.

V spanju jim se črni, mrkli čemer v glavi zbira,
A za ranja vun ga hiču, pregadiju dana,
Se jim je v živlenju kontra i na stran jih tira,
Firunga jim svet pokriva, črna, neoprana.

A mogli bi, da bi šteli, pozdraviti sonce,
Nosa v cvetje fteknuti i čuti dišečinu,
Mogli bi živlenju zlefka popustiti konce,
I samomu se sebi naluknuti v globinu.

Mogli bi očale črne posmeknuti z joči,
Da jim dan bleščeči čisto svetlo čez njih vleje,
Da jim kožu dežđ jesenski do duše premoči,
Da jim spere srce, beteg, misli i živlenje.

Da si osmeh deneju kak ramicu na lice,
Ljubav bi i srečne cajte drugim mogli dati,
Da jim radost trepče kak na tamburici žice,
Mogli bi se srečni v pajdašiju razlejati.

Mogli bi se vetru nek jih nosi prepustiti,
Z oblaki da lečeju, kak reka da tečeju,
Mogli bi i oni ovem svetu svetlo biti,
Mogli bi još kojekaj, mogli bi... al' nečeju.


Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.