Zdenka Čavić | Nemi svedoki

Stari obloki su nemi svedoki.
V hižici trošni su skriti
rasklimani ormar, rapava postel,
s prnjavom ponjavom pokriti.
V kuhinji je peč od blata,
roli kaj vrede zlata,
stolci s kojih je zdavnja
zgulena farba.
V zelenomu kredencu
drvena struganjka i cedilka spiju,
prazni štublaki glediju posudu,
tanjere vilice, žlice,
droptinice življenja zvoniju.
Štele bi pripovedati
kak je negdar bilo.
Zdavnja su ljudi pomrli,
zgaslo je teplo ognjišče.
Ni v stari žurnali ih
više nišče ne išče.
Prazni obloki, kak nemi svedoki
ostali su za seme.