Kajkavsko najže (1): Prepileni lokot

Piše: Aleksandar Horvat

Bok sima, evo, ja sam novi na štandu.

Veliju da se kajkavski nekak baš ne vidi v morju jezikov. A mi bi šteli pokazati i dokazati da kajkavski itekak živi i rabi se, kaj got Ljudva Gaj mislil o tomu. Poznam puno pajdašic i pajdašov kaj se saki den kajkavski spominaju pri svoji hiži, pak i one kaj pišeju z domačom reči, kak več ko zna i more, tak da nema brige, ima nas kaj beloga kajkavskoga graha. Ali, kak jedna moja jako dobra književna pajdašica z škrlakom veli "ljudi i inicijative nisu isto" , važno je da se z kajkavskim bavimo stalno, na vreme, na saki način, v saki priliki.

Tak po tomu sam i ja (kaj nije bitno) na Kvaki dobil štanda kaj od časa do časa zatrubim po kajkavski (kaj je bitno), pak na tomu lepo zafalim.

V glavnem, prepilil sem lokota na jedvite jade na dva mesta na levi strani na zasunu na vratima od najži, nastavil sem lojtru i zafalil pokojnomu dedi kaj je na kroh dal dva steklene črepe deti, čez jeden je sonce v jutro, a čez drugi popolne. Na mojem kajkavskom najžu je zato lepo svetlo i tu se kojekaj najde, kajti je tu saki odhitil i ostavil nekaj kaj mu ne treba, kaj je negdi našel, kaj je negdo zabil, zgubil, fkral ili skril, kaj se strgalo, znucalo, spohabalo ili jednostavno nigdo ne zna kaj je to. Stare stvari, stare reči, knige, teksti, pisma, vici, anegdote, recepti, posušeni crkjeni miš... čak i kakvo ime na škrneclinu zapisano.

Ja bum po najži prekapal na dnevni bazi. Kak bum kaj interesantnoga našel, tak si bum dal malo časa z tem ziti na vidjelo, morti negdo kaj svojega najde ili prepozna ili se makar zmisli prešlih časov, kaj staroga si ponovi ili se kaj novoga nafči. A o semu bu se koja dobra domača reč dala napisati

Tolko za vezda. Našel sem mom pri vratima jenu lepu domaču pesmicu z 93. leta pak bum ju moral malo preštudirati i sim na štand deti kaj sem zeznal. A to bu za koji den.

Do onda vas lepo vas pozdravlam i ufam da se bumo, obešeni na Kvaku, čitali v ovom zaguljenim koronarnim časima.