Kolumne

utorak, 21. siječnja 2020.

Denis Kožljan | Ča je to


novo lito, a stare navade,
hita se z pištole,
dica prez rišpeta,
kulture nideri,
vrag je doša po svoje,
pak ča če naprid biti,
kadi su finile kante i plesi,
kamo gre svit,
zbaštardalo se vrime,
pozabljene regule,
lazno ni, delo pita,
dite rove u zikvi,
zima umisto teplega mlika,
voganj požera je po zemlje,
na kega hiti krivicu, svi su
od svega digli ruke i noge,
ča je to....niman kega poskusiti,
niman se kemu potužiti...
prokleta mati ušla je kako črni
batun i stere sve prid sobun....

____________________________

navade-navike
ča-što
prez rišpeta-bez respekta
nideri-nigdje
kadi-gdje
finile-završile
kante-pjesme
plesi-plesovi
pozabljene-zaboravljene
regule-pravila
zbaštardalo-poremetilo
ni lazno-nema vremena
voganj-vatra
požera-progutao
hiti-baciti
rove-dere se, plače jako
zikvi-krevetiću
poskusiti-propitati
potužiti-pojadati
batun-dugme




Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.