Orehe smo farbali s farbom za peči
i ž njima za Božič cifrali jelke.
Jeli smo jaboke, ne preveč velke,
z mačkima vu krilu, kraj tople peči.
Po jelki je dišala cela hiža.
Stari so molili s čislom vu roki.
Božič so cifrali i mraz i obloki.
Molitva je babi vračila križa.
Lepo se zmisliti na te čase,
gda kruh se, onak, kak se šika poštival.
Vreme je to gda pokojni se glase,
a duša za svoj greh oproštenje prima.
Mi smo vam se kelili za raspelo
i onda gda nas nikaj neje bolelo.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.