Kolumne

četvrtak, 5. prosinca 2019.

Božica Jelušić | Samo spim



Samo spim, samo spim,
gda se spinčit nemam z čim.
Z kroha svrdla beli dim,
brunda veter kakti prim.
Samo dremlem, samo čmržim
i za tenku nit se držim.
Nikaj nemam nit kaj tržim,
falšne posle vse razvržim.
Ništ ne špreham, samo šutim,
zlevanku si tenku zmutim.
Na glupe se ljude ljutim,
bes prikosnem i prigutim.
Naša zbilja, sprhla, bleda,
puna buke i nereda.
Ta mi klima dihat ne da,
ovo vreme mi priseda.
Samo klenem, samo planem,
zaletim se pak zastanem.
Kam da zidem, kud da banem,
s takvem svetom jednostranem?
Moji ftiči, tužno pleme,
koji k Hiži svetla streme.
Ovo vreme, teško breme,
takvo vreme ni za mene.

4. prosinca 2019.
Božica Jelušić
Fotografija: Ivan Nivan: Staro korenje

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.