Naša prinčipeša nas čeka u kraju
zabljena na slike zada armerona
našli su je, brižno, neki dobri ljudi
čenili su za njo da zvoniju zvona.
Čudiju se ljudi čudimo se i mi
kad turišti pridu do blavega mora
u gradu ki čuva te stare pravice
zaspala je povijest u hladu od bora.
Imela si lazno, ne spi drugo, pridi!
Stoljeća pasana dala su ti force
čekamo besede od tvoje sudbine
Julija, reči nan štorijo udovice!
Povedaj kade si sve gospodarila
kada te je voli markiz i poeta
kako ste želeli bit škrbni i jušti
kad te je presekla bol od svega svieta!
Sad nas jopet gledaj, brani nas z nebesi
pušti da pridemo i brojimo perle
a ti pelji zmaja na teške kadine
dokle mi pridemo ti kade sada si.
_________________________________________
Slika: Sv. Julijana, Novi Vinodolski_________________________________________
Julija Frankopan-supruga Frana Krste Frankopana,smaknutog 1671.
prinčipeša-princeza,kneginja
u kraju-u kutu,sa strane
odzad armerona-iza ormara
brižna- jadna
čenili-naredili
blavo-plavo
u gradu ki čuva te stare pravice-Novi Vinodolski,referenca na Vinodolski zakonik iz 1288.godine
imela si lazno-imala si vremena
spi-spavaj
pridi-dođi
pasana-prošla
forca-snaga
besede-riječi
reči-reci
štorija-priča
povedaj-ispričaj
škrbni-skrbni
jušti-točni
jopet-opet
z nebesi-s nebesa
pušti-pusti
kadina-lanac
dokle-dok
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.