Kolumne

petak, 4. studenoga 2016.

Dubravka Borić | Vȅliko sȑca pod ȍkon bȉokova


U lūkȉ se odmõro dȏn.
Kȍćarice
na njȋdrima muȏra
dodirĩje sȏn.

Tȏ vȅliko sȑca
pod ȍkon Bȉokova
rekamȏn gungulȏ vȏl.

Vȉtrić mlȏd
hȋmne
i bandȋre
šȕškavo brojĩ.

Na kuviȇrti kȍće
izmīšȏ svȅ jazȉke
s vȍnjima muȏra,
sa ȍkuson sȍli.

Svãki se valĩć smījȅ.
U kãpjicima
kristōlȅ põli i pribȉre .

Srpolȉk mȉsec i ȉjade zvĩzd’

nad mūluȏn Pȍdgore mõle,

uz šȗm i liȇt ognjȅnega cvȋta
poviēzȏ rȉbore
i ȕdice svȋta.

-----------------------------------------
Manje poznate riječi:

dȏn - dan
kȍća, kȍćarica - ribarski brod
sȏn - san
rekamȏn - čipkast
gungulȁt - ljuljuškati
vȏl - val
mlȏd - mlad
bandȋre - zastave
kuviȇrta - paluba
vuȏnj - miris
pōlȉt - paliti
mũl - mol
mõlo - mala
liȇt - let
cvȋt - cvijet
poviēzȁt - povezati
rȉbor – ribar

23.09.2001.

Nema komentara :

Objavi komentar