Ankica Kale | Partenca

Ća je život na škoju
brez brodi i brez partence?
Jerbo se priko brodi
vazda u grad hodi
i uvik se gre na partencu
i uvik s valižan.
Uvik.
Gori i doli
u skule
u vižite
na pijacu
na peškariju
Na sud
u oštariju
na žurnate
na faturate;
uvik se brodima hodi
i uvik se gre na partencu.
I uvik hodi,
hodi
i vuci:
dicu
matere
ćaće
smij
I suze
znoj i breštime
 i škrip u kostin
 i  valiže,
 uvik valiže.

I pari se
ća su partence kraće
da se više valiža nosi;

jerbo samo na zadnju partencu
gremo brez valiža
i gremo bosi.


______________________________

Pojašnjenja:

Partenca – vrijeme odlaska
Gre – ide
Valiža – prtljaga
Skule – škole
Vižite – pregledi
Oštarija – gostionica
Žurnata – nadnica
Faturata – rad za nadnicu
Breštime - psovke