Snježana Budanec | Na gubaševe stanice je fučkal

Kad god bi dedek porinul vu hižu,

Hnuka ga pitala mam:

„Dedek gde si bil? „

On bi se mam fletne snašel:

„Na Gubaševe stanice sam fučkal

A za menu je cug huškal!“

I babica je znala spitavati:

„Kud si se smucal, deda?“

On bi se nasmejal i rekel:

„Sigde sam bil, sprešel sam se po sikud

I na koncu sem na Gubaševe stanice zafučkal!“

Fučkal je moj dedek po Gubaševim bregima

I kletima, po kmice i po danu.

Fučkal je, i košare, koše plel,

Fučkal z motiku po zemlje,

Fučkal je zkosu po gmajne,

Fučkal po rezbarenim drievem,

Fučkal po živine, po letu i zime.

Fučkal je svoje babice, sinu, snehe i hnuke.

I cuge je fletne zval;

Na daleke je vsiem svoj smieh dal.

Dedek je pri Gubaševe stanice fučkal

I dane si na zemljice zbral.

Nišči nije znal gde je Gubaševa stanica

I zake baš tam dedek ide fučkat stalne.

Hnuka je zrasla i ženiti se htiela.

Veselil se je dedek svadbe

I kak bu juškal jednak

Kak na Gubaševe stanice je fučkati znal.

Na svadbe se fučkati nije smele

Jer je dedek mesec prije ženidbe hnučice svoje,

Prešel fučkat veselice Božje

I nigdar se vrnul nije.

Sad same veter fučka ober križa,

A na Gubaševe stanice

Je puste kak prazna dedekova hiža. __________________________________________________________________

Govor Andraševca (Oroslavje)

Manje poznate riječi:

Porinul – ušao, sprešel – šetao, plel – pleo , gmajna – zemlja, živina – perad, fletne – spretno, zbral – prikupio, vrnul – vratio, ober – iznad

1. Nagrada na 5. recitalu kajkavske poezije „Stara Lipa“ 2023.