Senka Bradarić | Mogli smo, a nismo

Reka si – Gremo svako
na svoju stranu
ne moremo skupa
na zelenu granu.
Partili smo
ko zna di sve
vijađali nismo
radili ono
ča tili smo
guštali mi smo
a kad smo došli
na isto misto
i vidili se mi smo
jopet je sve bilo isto
ka da se nikad s mista
makli nismo.

Riči mi tvoje
na um panu
- Ne moremo skupa
na zelenu granu.
A e ... mogli smo
a nismo
sad smo tu
di smo
ka dva suva lista
dok ne opanu
sad moremo skupa
na suvu granu.