Zima je prešla i zgovora za nju
več nema. Proletje stiha pospanu
zemlu zagreva, diši po oranju,
igra se sonce na podravskem dlanu.
Vezda po pravdi i pravici iščem
samo za sebe falačec proletja.
Plašča zelenog nek ne bude nišče
kvaren, nit’ duhe proletnoga cvetja.
Zima je prešla i ja bi najrajše
zapoved izdal, da povrat se zimi
zabrani. Proletje je bolše, mlajše
se čutiju ljudi. I ja med njimi.
Vreme je pisanog cvetja, za branje
v pušlek, čekaju šume i steze na nas,
da se zgubimo v zeleno to tkanje.
Zima je rešt, proletje od njega spas.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.