četvrtak, 12. ožujka 2020.

Aleksandar Horvat | Zgublena robačka


Dok sem kak mali dečec svoje stareše pri domu z kože stiral, bi me odlifrali k baki na Dubovicu. Tam sem išel “služit”. A naslužil sem se kak veliki, celi dan po gmajnu, po šikarju, a najviše z dečkima na Plitvici, koja je pod dubovičkim mostom bila čista kak špigel. Plitka, sigurna, pošodrana z lepim čistim kamenčekima, baš prava za male zaigrane bose noge. Baš na to mesto v Plitvicu su žene hodale robu prat. Tokle bi jen čas po koritu, zeznale kaj ima novoga v selu, pak odišle dale za poslom. To smo još nekak strpeli.

A v leti dok je bilo najbole vroče, ze sih strani su nahrupili stareši moži i v Plitvicu potopili snoplje od konoplje. To nam je baš išlo na živce. Zaronili su snoplje na naša najlepša mesta i na njih pometali velike kamene. Po tomu smo se mi deca samo zadevali, ne smo imeli više kud gaziti. Onda smo jenoga snopa ftruc rastepli i pustili po Plitvici, nek plava. To je bilo taman za dobiti po riti, "zbogom Plitvica" i vrnuti se nazaj k špekulanju i delanju svirali od vrbe ili regača. Još se dosta bledo zmislim da dok se to konoplje razmočilo, za mesec dni, onda su po tomu tokli, česali, raščesavali i nekakvu kudelju vlekli vun. Čista gnjavaža. Stareši su navek bili čudni. Zmislim se kak su stupe i trlice trle, tak se to zvalo, a konoplja je mela posebnoga vonja. Za Božič smo popevali i prosili dare “Za konoplju i za lan i za masni kofrtanj!” Platno i jelo su bili važni v seljački hiži. Tak su nas nafčili. A ta konoplja mi je furt v nekakvi megli.

A vidiš, denes dok se malo pozanimam, vidim da su ti snopi bili jedna jako vredna stvar. Konoplja, to je ta vredna planta za koju veliju da ju je sam Bogek ljudima dal kaj budu z nje mogli napraviti se kaj god jim treba. Stanem denes na plitvički most v Dubovici i gledim: gde su brzaki pod kojima se srebro prelevalo i v kojima smo si hladili zaigranu krv. Otprem mobitela, povežem se z celim svetom i vužgi po konoplji. Evo, stara pisma veliju da se o konoplji piše več šest jezeri let, a da su ju kinezi imeli i pred deset. Od nje se delaju štriki, ribarske mreže, papir, platno. Originalni američki Ustav je napisani na konopljinom papiru, isto kak i prve Biblije i cela britanska enciklopedija do ne znam kojega leta. Rembrandt i Van Gogh su slikali na platnu od konoplje. O, kaj sem vse našel: more se napraviti biodizel za auto, za kakvu malu lampu ili za peč, građevni materijal, tetive za luk i strelu, uljiče i kojekakve pomade kaj pomažeju žalosnima i betežnima. Dok je još ne bilo pamuka, su od konoplje bile i ferunge i krevetnine.

Jeste vi ljudi znali da su i prve Levisice bile od konoplje? Strašna je to planta! Ali nekoji su se jedne slične, ali ipak drugačke preveč navžikali pak su ponoreli i po zraku zjake grabali. Vezda je radi toga celi konoplinjak na grdomu glasu. Denes ju pohlepni biznismeni ne voliju, očeju ju na se sile zabraniti, jer bi jim posla zrušila, zaprla bi rafinerije i se ove kaj delaju plastiku, drvna industrija naj imela kaj delati, kak niti ciglane, a za farmaciju bole da se ne zmislim. Od konopje nema otpada, vse se potroši.

Našim starima je konoplja bila draga jer je služila za vse i fletno je rasla. Lefko je bilo z njom dok je na polu rasla, malo težeše dok je zrasla, ali se zato splatilo. Čitam na mobitelu da su svetski pomorci na brodima vsa jedra i vse štrike imeli od konoplje kajti takvima ništ ne smeta slana voda, niti konoplja puno vode ne pije pak su jedra ležeša, fletneše se sušiju i ne prhneju. I mom se zmislim kakve smo mi zmišlene jedrenjake tu po Plitvici vozili. Vgasim toga vraga elektronskoga, pak se zagledam nazaj v brzake, vidim kak se peniju prek črnih debelih snopov kaj smetaju i na zadevi su… A gda bi navečer došli z igre, tek denes to znam i razmem, baka bi me hmila i zbrisala z brisačom kaj je čez tešku težačku moku z toga črnoga snoplja zišel tak beli, a sama ga je našila z merkom, francuski bod. Žgance i krumpira z vrhnjem je dela prek prestrtoga stolnjaka koji je zgledal kak brisačov vekši brat. A dok bi se išlo spat, na posteli se šepurila krevetnina od koje bi se moglo pet stolnjakov napraviti. Kaj bi tek bilo da sem se ogledal v stari ormar, a nesem. Blago, ljudi moji, blago, koje denes spi v bakini škrinji. Sreča kaj to neverovatno blago tak fletno raste, pak nas nadraste i preraste. Dok nas več ne bu, blago bu tu. Blago v bakini škrinji.

Fali vu nji jedna mala robačka. Nju sem sam negda, dok je još bila konopljin snop, v svoji deteči zaigranosti po Plitvici pustil plavati.

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.