subota, 30. studenoga 2019.

Željko Bilankov | Večera kod barbe Đorđa


(dvanaesta kratka priča pisana pretežno šoltanskim dijalektom)

Lipi je bi naš splis'ki stan di smo se početkom šezdesetih godin priselili iz Kninske. Ma propju lip i to na četvrtemu podu kuće, koju su svi zvali „kasarna“, jerbo je i sličila na vojnišku zgradu, onako duga, bez balkoni i sa krovon, bez tarace... i ko se ne bi siti barbe Šime, sa mornarskon kapon, kad je uzbrdo vuka kariolu punu stvari, dok smo selili, po još nedovršenon Mažuranićevon šetalištu, a ja ga onako mali, vesel i vražji, prati u stopu gacajući po kaški od nedavne kiše... Sad smo napokon u prvon vlastiton stanu koji je moj otac dobi od svojega poduzeća i ne moremo se nadivit njemu, hodnik, banj, dvi sobe i kujna, a tek pogled, sa sjeverne strane prima Kaštilima i Kozjaku, sa južne, prima Braču i našoj Šolti, eeh. Ipak, prin nego bi čovik sinja more i škoje, upa bi mu u oči neboder malo daje od nas, u ono vrime zvan „Plavi Radion“, pa se ni teško dositit, kako je ime dobi po tadašnjen vrlo popularnon deterdžentu sličnih koluri. Inšoma, tamo su na zadnjen katu živili prijateji naše fameje, meni puno dragi, teta Ljubica i barba Đorđe, sa dicon, mojih ili godin blizu mene. Često smo se posićivali, a kako onda još uvik nismo imali telefon, dogovor je bi da oni, koji će napravit večeru, obise crljeni šugaman priko ponistre, nek se zna, crljeno, nego šta! Tako   smo u suton, jednega lipega, teplega spli'skog dana, krenuli kod njih.

Cilo vrime puten, mislija san ča će du nan fino spremit, jer se znalo da su goluzi, posebno teta Ljubica, koja je o spizi pričala sa velikin oduševljenjem. Ma, ja san zna, da će bit malo pršuta, salama i sira, za predjelo, ali ča će bit poslin, eee to je mučilo mene malega. Nisan ni primijeti, a eto nas isprid nebodera. Posebni gušt bi mi je vozikat se lifton, pa san moje moli i kumi da prin nego zazvonimo na njiova vrata, učinimo još jedan đir gori-doli...hehhehee. Popustivši mojoj viciji, konačno smo stigli i nakon srdačnog dočeka ušli u stan, a ja san odma ćuti nike fine mirise, koji su dopirali iz kujne. Jeee,..rekli su mi, jist ćemo pašticadu sa njokima,..asti sto,moje najdraže jelo...koje prilipo iznenađenje. Dok su moji sidili u kujni i veselo pričali sa barbon Đorđem i teton Ljubicon, ozarenon, ali zarobjenon špaheron, ja san već divlja u hodniku sa njiovon dicon, mojin malin prijatejima, Aleksandrom, zvanim Aco i Sergejem, zvanim Buco. Naravski, odma smo se dodavali balunčićen, da bi potla igrali na male branke, jedan protiv drugega. Zajapureni u temu malemu prostoru, pokazivali smo svu žestinu žeje za pobjedon, cipali se, padali smijali se i derali

.Onda smo čuli: „Večera!!!“ i strast fuzbala, zaminila je žeja za kujnom, jer smo ogladnili ka pasi. Nažalost, morali smo prvo oprat ruke u banju i obrisat se onako znojni, dok su moji već sidili, teta Ljubica služila predjelo, a barba Đorđe stavja piće uz neizostavnu „Radensku“...i sve je bilo kako san reka, pršut sa bilin i crljenin, salam, kiseli kukumari idr., a pašticada, za prste polizat.  Izi san tri dobre fete sa malo njoki i obliziva se ka mačak. Nas sedan za stolon, lagano svitlo u dilu kujne di se jilo, drugo isto tako povrj špahera. Papanje, ćakulanje, smih, radost i veseje pravih prijateja. Bome, pari mi se da ni ništa ostalo na stolu, nakon nezaboravnog štrudela od jabuk, osin pribora za jelo i suđa, koje triba oprat na ruke, i ko je moga mislit da će to jednog dana, mašina radit! Potla smo prišli u veliku spavaću sobu, koja in je bila i tinel. Stariji su sidili, pijuckali i pričali, a mi dica vajali se po podu, već umorni i pomalo pospani. Ipak, makar san se boja visine, nisan moga odolit da ne povirin kroz ponistru u tu lipu spli'sku noć. Grad ka na dlanu, mijun svić ispod nas,  more i Marjan u daljini. Žute zvizde na nebu. Pomislin u sebi, koja divota!.

Kad smo odlazili doma, jedan od braće zaspa je u fotelji u nemogućen položaju, na kolinima sa glavon u naslonjaču!!!haahahha...ča ni dandanas ne mogu svatit. Brž je bidan bi toliko satrven, da ga je san privari a mi smo se još uvik temu smijali, na povratku doma u nike kasne sate, obogaćeni još jednim nezaboravnim druženjem sa dragim prijatejima!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.