srijeda, 20. studenoga 2019.

Željko Bilankov | Moj dida Tonko


(Osma kratka priča pisana pretežno šoltanskim dijalektom)

Puno san voli materina oca, moga dida Tonka. Pamtin ga ka visokog, krupnog, sidog čovika, lipog osmiha i jubavi za svakog. Zna bi mi pokazat rukon i reć: „Žele, dođi didi na skanciju!“, ča znači da me hoti s gušton stavit na kolino isprid sebe i zagrlit me onako malog, kako bi ositi njegovu teplinu i veliku jubav. Koji put san infišo sluša njegove priče, jerbo je moj dido svašta zna.., a kad bi išli jist, pita bi me ka tića i dava mi da pijen bokunić vina sa cukron,..oli je onda bilo sirupa, ka danas,..pa me gleda kako pijen i od dragosti se smija. Ponekad mi je u konobi pokaziva svoj postolarski alat, jerbo je on bi pravi meštar od zanata, a ja bi ga gleda kad je pravi one postole za u poje,..drža je meju zubima brokvice i onda bi ih na jednome malemu nakovnju zabija kroz kožu postoli, čiji miris i danas ćutin. Pari mi se da ih i sad vidim, a dido ih ogleda, samozadovojan i sritan kako su ispale! Ma ni samo to zna, zna je on i puno tega više. Pokaziva je meni i drugoj dici oliti starijin momcima nike štoseve, pa smo mu se svi divili. Voli je slušat radio u kujni i sav se drža nikako važno, kad bi pažljivo prati „Glas Amerike“.

Ne mogu nikako zaboravit da san jedanput, sav u čudu oklen dolazi prekrasna glazba 'armonike, uša u kuću i ka hipnotiziran, poče se penjat uza skale na gornji pod, di su spavala baka i dido. Inšoma dela šoma, jema san ča i vidit, čin san poviri unutra, vidi san moga dida Tonka, kako svira i piva ka slavuj, u zanosu polularnog šlagera „..u gaju tom, kukavica kuka,..“, na svojoj plonerici, maloj lipoj 'armoniki na botune, a prsti mu virtuozno skaču po njoj. Kaki je samo to prizor bi,..ma ni me ni vidi, nego je naprosto da oduška duši, a pogled u daljinu siguro mu je iša put Splita,..u vrime kad je svira na tancima u Gusara, još prin Drugega svitskog rata...eee, zna san mu ja reć: „Ajde dido, pivaj mi „pu, pu, pu!“, ča me i danas nasmije, ma ne sićan se koja je to pisma bila, samo znam da mu je bilo puno drago, ča mu njegov prvi unuk daje toliko važnosti. Ma, sićan se ja i ne baš lipe slike, kad san iša na Šoltu, obać ga, jerbo je bidan bi bolestan. Leža je na posteji, onako ogroman, otkriven, a noge su mu bile strašno otečene. Mater me držala za ruku, dok su joj se suze slivale niz lice. Ja mali, tad nisan zna, da je ima slabo srce i godinama se ni ti ličit, niti dava važnosti temu. Nažalost, mora je u bolnicu, di san ga skupa s mojima doša vidit. Na propusnici, jerbo se to onda moralo imat u spli'skoj Vojnoj bolnici, pisalo je Ante Burica, rođen ijadudevetstodevedesetidevete,..i dobro se oporavi, nakon još jednog infarkta...mater je rekla da je sam učini skale do našega stana!..,a baka Tonka je došla sa Šolte, sritna ča mu je boje i dida joj je obeća, kako ćedu se napokon maknut malo od doma i putovat po svitu, samo njih dvoje...lipo je bilo uvirit se u tu jubav starijih judi, jerbo su njiovi pogledi govorili više od riči...i sve je parilo da će bit dobro...sve do onega dana, na početku šestega miseca šezdesetosme, skoro tri miseca nakon ča san navrši trinajst godin, dana u kojen je dida stalno govori: „Ma, kad će Žele više doć iz škole, kaqd?!“.., ka da je zna kako mu je to zadnji put da će bit sa svojin najdražin unukon...i danas, kad se sitin, vidin sebe samog, uplakanog i priplašenog, jerbo san, na nesriću samo ja, na svoje oči vidi ti njegov treći, danas znan, smrtonosni infarkt, u kujni našega stana, u kojoj su gorila svitla poput najžešćih reflektora. Govori san u sebi, da on neće i ne smi umrit, doziva ga i nada se da će me ponovo stisnut u zagrljaj, dok se iza zatvorenih vrat di su me sklonili, ču plač i zapomaganje i di je trajala uzaludna borba za život mojeg dragog dide Tonka!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.