Željko Bilankov | Volin da si mi blizu

'oću da gren
i kad ne triba vanka,..
da projden pored
zamišljene trafike,
podignem pogled
prema ponistri tvojoj,
ka' da ću vidit
obrise najlipje slike...
'oću da gren
svaki dan u spizu
i kad jemamo
u kući svega toga,
ča će mi dućan
kraj moje zgrade,
'oću u oni
kod pilića moga...
Volin da si mi blizu,
makar ne smin
ni pokucat
na tvoja vrata,
lako bi ja
potrča skalama,
ča mi se teško popet
do trećega kata...
i volin da si mi blizu,
jer znan
da ću te srest
kad strahove svladaš,
ma znaš ti dobro,
ja san uvik tu
i kad toneš od tuge
i kad se meni, potajno nadaš !

Željko Bilankov