subota, 8. prosinca 2018.

Milan Frčko | Scifrana breza


Foto:Nikola Wolf

Tu gde breza je križ svržjem napravila
i spod žoto zelenog listja ga skrivle,
sova z meglom pospane joči  vmivle,
predi nek  bode nekoga fkanila.


Čkomeče  nebo kak  firanga zgledi

spred koje počivle listje od breze.

Ftica čeka da se zbudijo zvezde

i da v kmici znad Podravine leti.


Crno smeđe farbe od svržja i od sove

cifrajo sliko kaj prelepo zgledi,

a čkomina i luft verzuše love


tam gde jen stari stihoznalec sedi.

I jesen je lepa, nemreš ništ reči,

a zakaj i bi, kad nemreš jo zbeči.

Nema komentara :

Objavi komentar