Zorom, gda mrak z drevja splazne,
I sunce posrče tenje,
Žalim kaj su hiže prazne,
Kaj je v štali blaga menje.
Gdi blesika šoder sprudni,
Dok razvlači mreže večer,
Žalim kaj su ljudi trudni,
A na najžu prazne vreče!
Gda kraj škole mimohodim,
Gdi žlabraju nora deca,
Z kamenom se v šajbu zgodim,
Hižnoga jim klenem sveca!
Na breg idem, noč se spravlja,
Tenšivoga vlečem cucka.
Žalim kaj se fletno zabi
Saka svetla misel lucka.
Gledajuči z vrha brega,
V škarniclin bi selo stalo.
Gda se zmislim zevsem sega,
SEBE žalim još pomalo!
14.kolovoza, 2017.
Božica Jelušić
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.