dekle su si štikle obule
kak serne po asvaltu su tancale
mužika ih je vu dim hitala
z dima su same rouke kak roge vu zrak hitale
dečki su si cigaretljin vužgali
zalizali senju za vuhe da boju deklu vu kmice ljubili
električni bajsi razbijali su čehatvu neba čez vužgane perste neba
leta su to bila gda ni bile penez-Anno Domini MCMXCV…
sprhla je črno biela slika varoša
mramorna senja vu pelnice kak kriesnica vužga se i nestane vu kmice
zdej nešči drugi tuče vu električne bajse
i tanca na nekternu lucku popievku tere ja ne znam
hu mene zvira Still Got the Blues zate
z nebeskih najž rasipale se perje
angjeli na čehatve neba tancaju
gdo pita tera je zdej Anno Domini
glavne da se tu i tam kriesnica a hu mene senja vužga
senja nek žeravku poruošta
merti rastopi zmeržnjene perste neba i rasiplje dežč žeravke po nami
Gdo zna?!
nigdar čovek ne zna gda bu se kolovrat čehatve neba prestal vrteti
ni gda bu se razbila vu nami čehatva senja…
______________________________________________________
Kajkavski književni jezik
Srebrni Kaj na 8. recitalu kajkavske poezije „Božo Hlastec“ 2025.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.