Gordana Burica | Farmer

Prilistavajuć niki dan svoje dekumente nabasala san na pismo od Općine Split, Mjesni odbor Donja Šolta. Pismo je iz 1989. Potpišije ga mladi,  jušto svršeni pravnik koji je ka dite često dolazi u Grohote. U pismu piše:

„Obavještavamo vas da trenutno nismo u mogućnosti izaći u susret vašem zahtjevu“.

Spomenuti zahtjev davno san poslala, a radilo se o obeštećenju za moju zemju na Boroviku. Na dnu pisma je bi potpis činovnika i pečat. Na pečatu, ka ča je bilo normalno za ono vrime  bila je zvizda petokraka.

 A sve je počelo kad mi je starji brat reka:

Gorde, ajde u općinu. Počeli su nan ostavjat škovace na Boroviku. Nima puno maslin, ali više ih od šporkice ne možemo brat. Neka nan dadu čagod pinez ili ćemo ih tužit. Samo tako reci. Ko će vrag s njima jemat posla.

Bila san zgodna, mlada mama. Doduše, fina roba mi je bila u Splitu di san živila i radila. U Veloj luci di san provodila lita, kad san tribala poć na razgovor u Mjesni odbor, nisan jemala ništa pristojno za obuć. Ali, ko ih šljivi! Poć ću u kratgin gaćan, pa neka gledaju. Ma ča me briga za robu. Itako me u mistu di san se rodila svi poznajedu.

Dojden ja tamo, izrecitiran sve ča san mislila i vratin se u našu ribarsku kućicu u Zaglavu. Brez odgovora.

Sadašnjost koju jemamo na glavnon otočkon smetlištu Borovik, počela je sa Šimon Farmeron.

Starji Groćani znaju ko i ča je bi Farmer. 

Živi je u Grohotan. Tamo di je sad svitleći dvorac Spicijalić. Na pod di mu je bi  dnevni boravak, uvjetno rečeno, penjalo se klimavin skalan  ka ča su na gradilištu. A gori, ništa! Samo nikoliko šporkih dek i zagunjavi Šime. Jema je dugu bilu bradu. Na sebi niku iskidanu robu. Kosa sida, raščupana. Oko njega i po „kući“ širi se vonj beštij, mislin da je tako smrdi prč, ili kako se to književno reče jarac. Osin jarci, jema je koze, naša bi se i koji prasac. Tovar i pokoja ovca.

Mislin da je njegovon blagu postalo tisno u malome dvoru i prizemju njegove vile, pa je sa svojin bogatstvon sve više poče boravit na Boroviku di je bila njegova zemja. Jušto uz našu parcelu. Bila je tamo čini mi se i jedna pojska kućica ili kako se to reče bunja. U njoj je spava. Kuva sigurno ni ništa. Vice slikar bi mu svaki dan na povratku  iz hotela u Nečujmu, di je radi, doni bronzinić kuvanoga. Ni u jednome momentu se ni znalo di je Šime, je li oko beštij ili kunja pod kojon česminon. Vice bi bronzinić obisi o smrču i sutradan kad je iša na posal praznoga bi uze. Drugo, je li ča ji, sam Bog zna. 

U Selo je malo dolazi. A kad bi i doša, za njin je išla povorka njegove „famije“. Kozice, kafene, sive, crne, bile. Tovar star „ka panjoka“, šporak, sa zalipjenin govnima po tilu. Prasac, isto, šporak. Predvodnik kolone bi je veliki crni jarac koji je jema bradu malo manju od Šimine. I jema je velike roge. Ka da mu je jušto niko vodi jubav sa ženon. Prima njima se Šime ophodi ka da su mu stvarno famija. Kako su se životinje sve više kotile na friškome zraku i širokome prostoru, stado je nareslo. 

Zna je Farmer i prodat kojega jančića. Samo prijatejima, da in učini uslugu. Jer, bilo mu ih je žaj.

Dogovori se Vice da mu odredi jednoga jančića jer jema niku krizmu pa bi ga vajalo ispeć. Kad je doša dan primopredaje, Vice je ariva, a jančića nima:

- A di je jančić? upita on Šimu.

- A, vaja ga uvatit!

I tako su njih dvojica, ka ludonje trkali po Boroviku za jančićen.

Ča mislite, jesu li ga uvatili?

Vice je ti dan doša kod nas doma po dva tri velika jastoga koje smo držali u depozitu u Kominu.

U Selu je bilo dobri judi koji su Šimi davali staru robu i ništo za izist. Tu robu je on gomila, mokra je stala na hrpan u dvoru, vitar  ju je raznosi okolo. Sve  skupa je s vrimenon nareslo i 

proširilo se ka Karepovac u malome. Sličilo je  na prizore iz Markezovih Sto godina samoće.

Svi u Selu su znali ča se na Boroviku dogaja, ali niko se ni pača.

Šime je bi sritan.

Iako, jema je razloga bit nesritan. Privarili su ga drugovi iz partizani, naša narodna vlast. U drugome svitskon ratu bije na Visu u partizanskoj jedinici. Radi je ka postolar. Vrsni majstor. Puno generalskih čizam je šijola. A govoridu daje šijola i čizme vrhovnom komandantu.

Boračku penziju ni dobi.

Kad je došla nova Hrvatska i rodila se šoltanska općina, smistili su (čini mi se da je tako bilo, nisan skroz sigura jer tad san samo litovala na Šolti, i to daleko od Sela) ga u starački dom. Brzo se je vrati doma, ni moga bez svoji beštij. Ali onda više ni živi na Boroviku i ni drža 

beštije. Ostari je i bi je bolesan. Mislin da su ga poslin stavili na spisak socjalno ugroženih i Općina mu je davala kuvanu hranu.

Smištaj u njegovoj ruševini bi je još gori nego prin selidbe na Borovik. Nikon plastikon je pokri jednu tezu u dvoriću i tod je živi.

Niki duševni judi i tad bi se njega sitili. Moj pokojni sin mi je jedan put reka:

Znaš da san Farmeru odni jastoga, frigane ribe i kruva. Daj, kupi mu digo napolitanke i sok pa mu odnesi.

To san učinila dosta puti.

Ali ni to bilo dovojno. Opet me je sin poče molit:

Mama molim te zauzmi se za Šimu. Ti si pravnica,  ja ne znan kako to ide. Dobila si za vašu zemju na Boroviku deset ijad marak. Daj baren se potrudi pa isposluj čagod i za njega.

Ajde sinko, pusti me na miru. Niman ti ja force,  odgovorila san, štufa od svega i svačega.

A ja san zaozbijno  prin tega neplairano postala bogatašica. Pineze nisan zadržala zase. Išli su za tužnu obitejsku potribu.

A Šime Farmer je parti. 

U niku drugu ogradu i pojsku kućicu.

Jesu li gori s njin njegovi prijateji, njegove omijene beštije, ne znan.