Tote san...jopet ka i prin stojin na starin stinan Vratića puta, inkantan lipoton prošlih vrimen prida mnon. Livo je vela bila kuća glazbara Zakarije, odma do njega su ribari Foretići, a malo daje potleušica iz koje upravo izliza Bakiki, mršavi zamišjeni starčić vično s duvanon u justiman. Proša je blizu i ni me pozna! Nizdol, pedeset metri u pravcu Zadružnega doma drvena su vrata Mutića, dobrega prijateja moga dide Tonka, a desno isprid mene natkrivena marangunija barbe Bilota, puna drv.
Priberen se, uzdahnen i zakoračin naprid, a srce u grudiman brže zakuca čin san bliže mojiman. Prvo mi jopet udesno pade pogled na bakinu gustrinu. Eeh, koliko san puti iz nje vadi siće pune friške ladne kišnice pa halapljivo loka izmoren i znojan poslin divjanja oliti raznih igar po selu, a borami i kad bi upeklo sa neba, deboto ka i sad. Nisan moga odolit pa otvorin mala gvozdena vrata da obajden tetin prilipi vrtlić koji je tako pažjivo čuvala i njegovala...Gude u kocu odavno nima, a iz stare kućice sa krovon od kamenih ploč i fumaron već dugo ne dimi. Jemali smo u njoj peć u kojoj se nekad peka kruv i posebno ukusni kruščići, legendarni bubci. Ma, ništa slaje od tega. Inšoma, nisan se ni ošrva da me didov rođak Kažo, zvani Ćale ćiri u ladu svoga dvora i jedva čeka upitat: „Žele, jesi li ti to, otkad te nisan vidi...kako si?“ Vajalo je kurjožastog čovika prvo lipo pozdravit i progovorit čagod š njin pa mu ka i slišniman odgovorit najboje ča moš i reć da jedva čekan vidit baku i tetu. Na to je on uz osmih potvrdno mahnu rukon. I eto me jopet na istemu putu. Vruće je usprkos jutru ranega lita pa gotovo da nima nikoga vanka. Isti tonobil barbe Stanka, očeva ponajbojeg prijateja od ditinjstva, parkiran uz bakinu kuću govori da su brž doma on i njegov sin Ozren kojega bi voli vidit. Livo san poviri u njiovu ulicu punu zelenila, ma ona ka da spava, a ja moran daje. Odma do nje kuća je meni posebno dragih, tete Mike i barbe Crnog, očevog prvog rojaka. Gotovo uvik kad bi doša u selo oni su bili u dvoru ka da su znali, ča me silno radovalo, a bi je i red da se mi mlaji javljamo najbližiman. Srdašni prima meni, nasmijani i susretljivi pitali su me za mater, oca i brata, a ja in uzvrati na isti način jerbo san puno voli i cini njiove ćeri, moje rodice Miroslavu, Marinku i Nives. Dobro smo se razumili pogotovo u kašnjin teškin godinan. Ipak, nismo zaudobili našalit se oliti ispričat koji dobri vic.
Najednon začujen šušur vanka i učini mi se kako niko izgovara moje ime. Pozdravi san ih, a ionako san mora ić. Ma, jema san ča i vidit. Pročulo se da san doša pa su isprid kuće na širinu sa prastarin kamenin sidištiman takozvanin saadiman, izašli nasmijani teta Mare i barba Bilo. Pozdravili su me od srca i pitali za moje, a javi mi se svojin fureštin glason i postolar Mustić kroz ponistru svoje malešne radione. Ni prošlo minut, a eto ti tete Marije, sestre moga dida Luke koja me puno volila pa je njezino milovanje mojeg lica pokazalo sve. Pravi neorelistišni prizor malega mista, pun jubavi, veseja i dobrohotne ćakule. Svaki od njih bili su mi dragi na posebni način. Teta Mare, vrsna kuvarica i barba Bilo, rojak dide Tonka i čovik koji je prodava čuvenu crvenu narančadu, moju čežnju iz ranega ditinjstva. Kako nisu jemali vlastitu dicu njiova vrata bila su sviman otvorena. Tamo san s još nikiman iz sela na jednon od ritkih televizori u to vrime, gleda spušćanje čovika na Misec. Smija san se komentarima da se Amerikanci nisu ni iskrcali, da je snimano na Zemji, po jednomen čak na šoltanskoj Gradini idr. Bome, danas ima slišnih teorij i ča sad reć? Teško je za povirovat da nisu spustili čovika kad mi još odzvanja ona Armstrongova izjava čin je stupi na tleh tamo gori. Pari mi se da je moj sadašnji korak na putu do vojenih veći i važniji od njegovog...I bi je.
Sve brži otkucaji srca i teplina u meni jača od sunca u podne rekli su mi duši da san blizu. Oprosti san se sa sviton i okrenu prima putu koji vodi do bake, koraciman ka da se tek učin hodit. Prolazin nečujno vrata Terine konobe i ugledan zid na ulazu u dvor na kojemu ovi put ne side ni baka Tonka ni teta Ćire jerbo nisu znale da ću doć. Često su me tako dočikale radujuć se našen susretu. Pogled skrenen prima vojenoj kući...konoba zatvorena, aloj, tetine kale i đirani na balaturi pare mi se lipje nego ikad. Vidin sić s kin će ih teta zalivat i odjednon pripoznan njen glas koji dopire iz kamare. Ka i obišno dovikuju se ona i baka iz kujne. To je ništa kako bi je baka znala vardekat: „Ćirila, Ćirilaaa...dojdiii domaaa!“. Živile su same, baka udovica, teta neudata, predodređene jedna na drugu pa ni čudo da su se znale i svadit za glupost, ali bi uvik jubav privladala.
Odlučin ne reč ništa i polako se uspinjen skalan da iznenađenje bude potpuno. Vrata od kujne otvorena, baka sidi i čisti fažolete, podigne glavu i pogledi nan se sritnu. Ajmeee, kaki je to bi pojubac i zagrljaj uz poneku suzu na bakinu dragon mekon licu. „Žele moj, doša si nan...ča se nisi javi...jo ča mi je drago...evo Ćirilaaa, doša nan je Žele, vamo dojdiii!“. Ona se učas stvorila razdragana i reče gledajuć me ravno u oči: „Znaš, tako mi je drago vidit te opet...nisi zaboravi tvoju baku i tetu Ćiru...volimo te do neba!“...izjubi me i čvrsto obgrli rukan ka da me nikad neće pustit. Sritan zatvorin oči pa joj uzvratin na isti način. Parilo mi je da san tako osta cilu vičnost kad me prene glas osobe koju san još uvik čvrsto drža. Samo to više ni bila teta Ćirila, nego moja prva rodica Ivanka, ćer jedinog maminog brata, barbe Ive. „Ej, Želeee, ja san vode...di si odluta, ča je tebi?!“, reče mi, a ja se odmaknen u čudu. „Došli smo skupa i mene si zagrli kad smo vidili da tamo višje nikoga nima, da je sve ono lipo ostalo samo u našin sićanjiman.“...Okrenu san se još jednon, samo ovi put na odlasku dok san guta suze plača duboko u sebi.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.