Željko Bilankov | El Shatt, njiov novi dom

Proleksis enciklopedija-Leksikografski zavod, El Shatt I Proleksis enciklopedija!

(pedesetosma kratka priča pisana šoltanskin dijalekton – nastavak prethodne priče)

Ferata se odjednon zaustavila i onda nastade sablasni muk. Para je još uvik pištala, ali sve slabije dok je žuti salbun prid njiman peklo jutarnje Sinajsko sunce. Judi su se u čudu ogledali i pitali ča se dogodilo, kad je slidila komanda da svi polako izajdu vanka iz vaguni. Da, bila je to nepostojeća stanica na istošnoj strani Sueskog konala, a dva kilometra daje, čeka ih je El Shatt. Niki su to načuli oli znali, ma veli broj izmrcvarenog svita pita se ča je po sridi i di će sad. Jopet su mnogi seli na valiže ili na vrući salbun uz brundanje i zamišjene izraze umornih lic. Jedino je mularija došla na svoje pa su većinon trkali naokolo i vatali se ka poludili. Čulo se vardekanje starijih, od straha da se dici ča ne dogodi. Naravski da su taki dolazak iskoristili rojalisti ubačeni u zbjeg, simpatizeri izdajniške vlade i kraja koji je pobiga i ostavi svoj narod na cidilu, da ponovo ka u Port Saidu, rovare meju sviton. Govorili su in kako sad mogu vidit di su ih doveli i da ih u logoru čeka pakal,  s namiron da ruše slogu i podršku naroda NOB-i, ča in ni uspilo ni potla. 

Inšoma, malo kašnje, a parilo je niotkud, počinju stizati kamijoni za transport, napokon u njiov novi dom, logor El Shatt. Prviman koji su stigli tamo, ostale su riči u grlu, a oči se razgoračile, jerbo su prid sebon ugledali velo šatorsko naseje, kroza koji je prolazila široka asfaltirana cesta, nikoliko zgrad od matuni i late, par manjih tuševi i zahodi. Sve ostalo bi je čisti, žuti salbun sinajske pustinje! Ti jedinstveni platneni grad bi je baza 8. britanske armije za vrime slavnih pobidnički bitki kod El Alameina, u komen su savezniške pozadinske snage jemale zadatak, izbjeglican postavjat šatore. Osin njih, dočekali su ih probrani partijski simpatizeri, ranije smišteni u logor Amirya kod Aleksandrije i dobrovoljci  NOVJ, mahon Slovenci, ka pomoć za uređenje i prihvat zbjegovi. Oni koji su jemali sriće dobili su od Saveznikov već napravjeni popločani šator sa postejan od pletenog lika, a niki su tek morali da sudiluju u gradnji istega...naučit kako se rade i potla donosit posteje, odnosno ležajke iz kamijoni. Ipak, većini se otelo iz justi: „Judi moji, kako ćemo živit vode?!“

Ko je onda moga znat da će smišna dica, mala Marija i berekin Marinko mali, iz dvi famije koje su sa drugin Šoltaniman dilile šator, jednog dana postat moji roditeji. Ma, još od njiovog bolnog odlaska sa škoja bili su skupa...od Visa, Barija, Tuturana, Santa Maria al Bagno, Taranta, Port Saida pa sve do El Shatta. I sad su tu, u tako malešnon prostoru u kojemu se smistilo dvadesetak judi, biranih po rodbinskin, susidskin oliti prijatejskin vezan, kako bi se stvori osićaj zavičaja...u prostoru di se družilo, veselilo, tugovalo, jilo, sidilo, prisvlačilo, spavalo i nažalost umiralo. 

Ipak, unutra ni bilo toliko vruće, jerbo su ih štitila tri sloja platna, jemali su i ponistrice, a vrata su bila od istog materjala i vezivala su se konopon kod udara olujnog pustinjskog vitra Giblija. Kad bi zapuha ni se oči moglo otvorit od njegove siline, a sitni salbun uliza je deboto kroz kožu. Inšoma, dalmatinski svit, oduvik vridan i uredan, trudi se da u takin teškin životnin uvitiman šatore deboto pritvori u prave male stanove. Mislili su i kako će voda u pustinji bit veliki problem, no kanali za opskrbu prostirali su se izmeju šatori. Pitku vodu dobivali su iz rike Nil, pa se pumpan i civiman dilila duž logora. Sićan se kako mi je otac priča o jednemu čoviku koji je stalno žedni, a zvali su ga „Peri-peri“. Bidan je non-stop visi i čuča špinu pa je bi cili rasteka od tega. Zato je i meni u ditinjstvu znala reć moja baka Tonka, ako san loka vodu nakon ča san se oznoji: „Žele, ča to činiš, isti si „Peri-peri!“...hahhaahha Ipak, kako nisu imali problema sa vodon, isprid nikih šatori bujali su lipi malešni vrtli. Znalo se dogodit da od pajic dinje oli naranče izrestu stabljike istih. Ma, u početku je hrana bila izuzetno siromašna i služila se u većin šatoriman, a potla su izgrađene kujne i prostorije di se, zahvaljujuć UNRRI, puno boje jilo i to tri puta na dan. Ni in falilo mesa, angriza, povrća i voća. Ipak, starci, a posebno dica koja su postajala momci i cure, mogli su uvik jist. Jednon je tako očev prvi rojak, Bepo nakon obida još bi gladan pa je moli maminu sestru, uvik đavlu tetu Ćirilu, da mu da barenko dil onega ča je sačuvala za potla. Naravski, ona mu za dišpet ni ispunila žeju, a još se i hlihliščala, da bi joj on razočaran odgovori sa samo jednon riči: „Pasuuu!“ ☺  (nastavja se...)