Katarina Zadrija | Laku nouč žouti

„Naj, naj, naj, bodem dobra, same sem štela Žoutomu hižicu složiti! Naj baba Žoutoga touči! Boudem ja koš oprala i svoje prnjke! Se boum oprala same naj Žoutoga touči!“

Baba žoutog touče.

„Kak ga ne bi toukla, poljek njega si pri hiže na samu Cvetnicu svađu napravila ti mrcina mala!“

Morti same senjam. A zake se nemrem zbuditi? Zakeeee!

Nešte me cuka za rame. To je Stara baba.

-„Diži se gad malji! Kej tak douge spiš? Ščera si skorem na se nas batine navljiekla! Kak te nie sram? Kakve si zlo pri hiže napravila! Nište se z nikem ne spominja! Oblječi se i poječ taj kroumper kej je od ručka ostal! Bormeš si dobila batin, zapometi si to dobre! Pristranči se kak i saka poštena dekla!"

„De je mouj tata?“

„Za toga vraga pitaš? Kak nebi, ste jednaki, niškoristi. Nimale se na nas niesi vrgla. Je z onem pijancem v šume.“

„A Mama?“

„Z babu v gurica. Sama si z doumlju, sad te boum ja pometi nafčila“

„De mi je lopta?“

„Na mojem ormaru pod moju peroutju! Niesi ti vriedna lopte. Toga tak nije bile trieba. Onaj zatrajanec bi cijelu Horvacku poljek tebe zatrajal. Gda cigani peju po selu boum ju malomu ciganu dala. Gda se najiš tu na stolu ti je vangljin. Stani si na šamrljin i operi mertučje. Poklje toga zmeti hižu. Nemo ljenčinu i niškoristi ranili“.

„De je Žouti?“

„Taj gad od mačka je v štale. Spi. Ne bouš se denes nikud z njim smucala! Gda se zbaviš bouš f hiže. Nepeš vun. Nafčila te boum ja kej je poštena dekla!“

Ja bi same rada da me nešte podraga i privine. Niemam nikoga. Same Žoutoga i Tatu. Tata je v šume, a Žoutoga mi Stara ne da videti. Souze kaplju v vodu v koje perem mertučje.

F hiže sem zaprta sama. Stara baba neke vune diela. Pri susedu je poun dvor dece. Igraju se, loptaju, viču i smieju. Same sem ja sama z ovu biebu kej ju Sestrična nie štela, pak su ju mene dali. Neču tou biebu i neču! Baš neču! Rada bi onu, če bi smela, kej sedi na koperte sried mamine postelje. Njou nesmim dirati, da ju ne bi potrla. Velji mama da je je to kuma dala na dar gda je v zamuž išla.

Mama i Mlada baba su došle z gouric. Gda smo ostale same, Mama je z gredenca z guornje ladice zvadila petsto-pet boumboune. Dala mi je jenoga, privinoula i rekla :

„Naj nigdar više biti zločesta, da te nem mourala touči.“

„Ne boum mama, nigdar." Privinoula sem se k nje.“

Tata me večer podragal po glave i pital jelji me kej bolji. Rekla sem mu da ne.

Jutre su se Mama i Tata baš ljiepe gledali. I spominjali. Delati treba. Pak su očle babe v gurice, mouži v šumu.

Rada bi se lotala, ali je Stara baba rekla da loptu nies zaslužila i da lopta nie za deklu, niti biejžati za loptu.

I drva sem je nanosila v hižu i kokoši i piceke naranila, se stanje zmela, sad bi se rada igrala. Ščera mi je cielji dan predekuvala da se niemam kej s selski kejgodi spravljati, da mi je v hiže kak i sake poštene dekle biti. A kej si misljim da se ona zabila kakva sem v nedjelju bila? Na takov veljiki svetek, na Cvetnicu sem veljiki grieh na hižu navljiekla!

„Imaš se cielji dan v hiže Bogeku moljiti da ti griehe oprosti!“

Moljim se ja fejst, ali bi se rada z decu igrala, z Žoutem po sinokuše bejžala.

Če bi ja znala kej je to poštena dekla! Ne pusti me vun, a vune tak ljiepe sounčece grieje, z poul sela se deca na sosedovem dvoru igraju, a ja mouram biti zaprta.

Neboum, neboum i neču!

Gda je odvečer zaspala, čez obluk sem skočila k sousedu.

Pod dud sem stala i glednim kak oni graničara igraju. Rada bi se loptala, če bi me zvali. Zanji su me pout sterali, niesam loptu vlovila.

Senjek me of pout zovu nek se doujedem igrat, jen njim za igru fali. Bejžim sim i tam. Znam da me nesmi pogoditi, išla boum mam vun. Mouram loptu vloviti! Mouram! Drugač se više z domlju nedu šteli igrati, mouram. Pogodili su me mouram vun! Pošpotavaju mi se da sem mljitava, da ne znam loptu loviti.

„Kak trout si!“ Viče mi Dekla z Gournjega sela

„Bogek, zake ja mouram navek biti zrende? Zake same mene vele doma da se nesmim z drugu decu spravljati? Jeni su gorši, a drugi su pak bolši i oni se itak z doumlju nečeju igrati. Zake sam sama? Niemam ni brata ni sestre kej bi se z doumlju igrala. Saki dan mouram biti z onu zločestu Staru babu, koja mi furt predekuje i same me štaljiera.“ - Stisnula sem se za štagljem pod naš kup. Najrajši bi nouter vljiezla i nigdar vum zišla.

Navek mi se si smijeju, same njim kumin Matek veli da kak je nie sram. Baš me je sram, mene, samu mene! Da bar nies dekla. Zake Stara baba misli da se dekle ne smieju loptati ni z dečeci igrati?

Vičeju :

„Matek kam ideš? Se neš več igral?!“

„Proč! Jen je bil višek! Sad se morete igrati graničara."

„A tu si. Jedva sem te našel!" Naj se plakati. Boum te ja nafčil loptu loviti!"

„A kak? Je Tatek loptu kupil, pak ju je Stara baba na ormar diela. Veli da nie za deklu loptati se.“

„Joooj je ta tvoja baba zaostala i dosadna. De je lopta boumo ju dosegli.“

„Lopta je na babinem ormaru v komoure, a komoura je zaključana.“

„A niš ounda.“

V trnacu smo si na kladu seli i jen čas gledeli kak stožera za vuzmicu na sinokuše zakapaju. Jeni drva zmieču.

"Si jiela gda kiseljice" pita Matek.

"Jes, fine su! A jelji ti znaš od radiča delati rinčece?

"Ne znam! Dečki ne nose rinčece.

"A lancek?"

"Niti to"

"Vič, ftrgneš radič, z douljnjega kraja načneš. Napraviš više svitnjakov. Z prsten je rievlješ do cvieta. Na proubaj!"

"Pak nie to teške delati. Ti slobane denem rinčec na vuhe?"

Prignoula sem glavu. Ljica mi gore.

"Deni"

Pribljižil mi se i del mi rinčec od radiča. Srčece mi je kotarile kak cinkuš opouldan.

Brže smo se povljiekli saki na svouj kraj klade na koje smo sedeli.

"Čuj Matek ti je ljiepe naše sele? Mene je. Fejst. Vidla sem ga z visokoga.

"A de si na visokem bila?"

"Bila sem z dedem i babu v gurica znaš ounda gda još ni jenoga lista na granju nie bile. Dimam smo išli i ded me na vratu nosil. Tak z visokoga su mi naše hiže kak bielji zoubi zgledale. A ovaj asfalt kak grbavi jezek med nijmi. Gda sem to rekla mi je Mlada baba rekla da kej mlatim bez veze."

Matek je na krtovincu z batinu hižu crtal.

"Je tak neke bi mogle biti. A one črljene z cigla i stare su onda pokvarjeni zoubi!"

„Matek si ti gda videl kak se vuzmica diela?“

„Jesem, kak ne, lani sem z tatekem delal vuzmicu.“

„Ja nies nigdar...“

„Naj biti žalosna. Če očeš moremo iti tam gledet kak dielaju.“

„Bou me Stara baba špoutala!“

„Idemo postiha, ne nas vidla.“

Skradamo se mi po trnacu, a Stara baba z hiže viče :

„Dekla de si? Koud si vušla? Bouš ti vidla gda mene v rouke dojdeš! Se lasi ti boum spukala!“

„Tu sem! Idem dimam, sem se same male z decu igrala!“

„Gad jen, z dečkem se ti okolo klatiš! Te nie sram? Se ti boum matere poviedala!“

„Stara baba kej koraba, stara baba jena žaba, stra baba črni trček, stara baba črni trček, stara baba veljik čvrček!“ Potancuje Matek na jene noge i draži babu.

„Sad ti boum ja pokazala!“ Nahiti se baba z boutu na Mateka, a Matek gas dimam.

„Ti kosmunđa f hižu za stol!“ Zavikne baba i posegne z rouku da me bou za lasi vljekla. Ja sem se zmeknoula i odbiejžala v kuhinju.

Skrila sem se pod stol. Znam da se baba nemre prignuti i da nemre do mene.

Stisnula sem se pod stolem na škripeti. Bogek, kej sem pak napravila! Sad boum pak bijena. Zake nemrem biti sama? A zake mouram navek sama biti? Stisnula sem šakice od staha, souza souzu lovi. Njarajši bi zginula, v zemlju prepala.

Baba viče da bou se mame povedala. Čkomim. Zoube stiščem. Kej boum sad? Mama, ja te tak fejst imama rada, prosim naj me touči, mamaaa... zalupila je baba z vrati i zišla vun.

Pred hižu na ganjku, na štokrljinu sedi Stara baba. Furt neke koše z zoubmi. Šte zna jel kej ima vu nji ili to same tak z navade diela. Prebiera krunicu v rouka, moti molji. Če i molji misli su je na drugem kraju:

„Kej nek sad dielam? Štela sem venoga maloga gada nafčiti pameti. Bou vidla kak je bou gda zraste! Bogek zake daš da se dekle rode? Gda se dekla narodi same još jena moučenica na sviet doujde. Ni jene dekle na tem svietu nie trieba kuljika je ž noju mouka otraniti ju i opčuvati da bou poštena išla zamouš! A kuljiki je trošek? Treba ju dobre opravljati, treba ju v zamož otpraviti. Dekla hižu rastače, a dečko k hiže pritače. Ona bi se same igrala. Treba se od mala delu vučiti. Kak sem je mogla svoji dvanajst sestri i bratov otraniti skup z materiju. Same sem čkomiela i dielala se kej mi se rekle. Ovaj mali gad se brže zbavi i ounda bi vun. A kej je v nedelju napravila? Još ju onaj vrag nie dal štaljierati! Bou videl gda zraste i gda dopelja nekakvoga, boudu ga skup touklji. Če nedu si oni skup venu našu sirotu mazali! Joj bogica, nie ga štela zeti, poljek sela smo ju ženili, da ne stara dekla, na koncu mu je mourala roditi, kak da je toga pri hiže bile trieba. Nesmim povedati da sem ju zapirala v hižu, bi me živu pojeli. Najbolje čkometi kak da nie niš bile.“

Si su se k hiže prikupili. Mouži su v štale, babe v kocu i pri doujbe krav. Stara si je baba sela pod peč. Digla je rouku i zagorzila mi se :

„Čkomi da niesi jezeka z zoubi spuknula! Če pregovoriš, se boum poviedla kakva si bila. Ounda bou boug te osloboudi. I oča te bou toukel!

Poseidali su za stol. Mama je skuhala kokorieznu kašu z putrem za večerju. Zovu me nek idem spod stola vun, k večerje. Zvljiekla sem se vun. Stara baba me je grde pogledala. Kak da bi me kača vgrizla.

„ Stara baba je čup potrla!“

„Niesem, gad jen malji. Niesem, najte gadu veruvati!“

„Jesi, jesi i meni si rekla da nesmim nikomu povedati. Za štagljem si ga zakopala! Jesi, jesi, jesi!“ od straha sem lagala i v sebe bogeka z oprost prosila.

„Kej? Kej si to napravila? Još i to bouže diete vučiš lagati! Sram te bile mrcina stara! Jelji ti znaš kuljike čup košta? Tak stara i kvara dielaš, a to bouže diete znaš špoutati!“ - ribale su Staru babu Mama i Mlada baba.

„Nek ti bou Stara baba! Vič kak to je gda si sem rugle, a ti se smieješ mene gda me si za rugle imaju! Još cirkuse i sama z mene dielaš“ - furt si spremišljavam- „senjek, grie je, mama velji da se lagati nesmi, a če Stara baba povi da sem čez obluk pobiegla, če povi da sem se v trnacu z Matekem igrala, a dekle se z dečki ne smieju igrati... oće nešek koji jesi na nebesi pomori mi....“ Stiščem šakice i rada bi mam spala, če bi mogla.

Pobrali su se si spat. Skrala sem se z hiže. Baš je Žouti z štale zišel. selji smo si na pocek ganjka.

„Znaš Žouti, štela sem tebe v nedelju hižu z blata napraviti. Z veljikoga koša pletenoga. Si su spalji i dok su se zbudili niesu znali de sem. Dobila sem batin i si su se križ-kraš pri hiže posvadili. Od ounda me Stara baba saki dan štaljiera. Denes sem je vrnoula. Sem se zmisljila da je čup potrla. Če je baš i grei. Boum se moljila Bogeku nek mi oprosti, boum! Si su na njou vikali, kak i ona viče na mene. Praf je boudi kad je zločesta!“ - Žouti je jen čas brundal, ounda se digel, z repem me požektal i očel. Gladen je, ide miše lovit. Same se name ogledal, kak da mi velji: “Laku nouč“.

Idem, idem i ja na postelj.

„Laku nouč Žouti.“