Kolumne

Jelena Hrvoj
Patnje mladog autora

Ela Ernoić
Rozin kutak

Mirjana Mrkela
Ispovijed jedne čitateljice

Jelena Miškić
Pramcem u sumrak

Martina Sviben
S kodom bluesa i balade

Aleksandar Horvat
Kajkavsko najže

petak, 15. travnja 2022.

Željko Bilankov | Nestali se vraćaju



(svršetak kratke priče o litnjen danu dvoje zajubjenih, pisane šoltanskin dijalekton)

Ma, prenula me i škrika dice ne samo galebov, a tako san rado želi zakunjat zavajen na velon šugamanu, stepljenon „podnin grijanjen“ vrućega žala. Protrjan oči, Ini ni traga, kad začujen njezin smih iza mene. Naravski, uvukla se malo višje ispo' tamarisa i sakrila od znatižejnih pogled, jerbo je odlučila isprovat još jedan prikrasni bikini, već treći danas! Bi je to malešni bili, ka stvoren za nju. „Jeli ti se sviđa ovi?“, upita me provokativno, znajuć moj odgovor. „Iste je boje ka i tvoj ogromni šugaman koji ni za plažu, ali puno lipji od njega, zar ne?...hahhaaha“, našalila se i utekla prima moru. „Iman i ja treće mudantine, sad ćeš vidit!“, rečen i učas ubućen baš one njoj najdraže, za koje me pitala di su. 


Ni mi puno pobigla, pa san zaroni ka pravi šototajer. Ti san je iznenadit i barenko uvatit za nogice poput vele hobotnice ča san jedva i uspi, iako se gotovo izmigoljila. Bistro podmorje, teplo popodnevno more i eto nas u novon zagrljaju, spojeni mokrin zagrljajima naše jubavi. Nan se parilo da smo jedini u temu čudesnon plavetnilu, a svugdi okolo svita ka u priči, galame, hlihliščanja i litnjih ludorij. Malo daje od nas, pričvrščen za bove, bi je raznobojni vodeni park sa naqpuhanin plastičnin elementiman, među kojiman se izdiza primamjivi tobogan. Nismo mogli odolit, jerbo se probudilo ono dičje u nan i već san je u stopu prati prima temu morskemu čudu. Pokušavali smo, padali i napokon se uspeli, divjali sve u šesnajst, pa se ludi od smiha i veseja vratili istin puten. Inšoma, vrime je teklo, no tili smo još mrvicu ostat u plićaku, jerbo je to istinski gušt. Ležiš na prsiman kojiman tek neznatno dotićeš dno, valići te zapjuskuju, a ti se pripuštaš nirvani toćavanja poput nasukanog broda. „Ja gren vanka,  kad ću osušit kosu? Tebi je lagje, oćeš da me punta na povratku doma, znaš da uvik puše priko mora?!“, govori ona, dok prida mnon izranja njeno divno tilo, ukrašeno kapjican pripunih sunca. Gledan je infišo ka i prvega dana, a srce mi šapje koliko je volin!


Opruženi na žalu tik uz more, namreškano od meštrala, sušimo se upijajuć poslidnje zrake uoči onega ča nan nikad ni drago, prin odlaska doma. Plaža je još uvik dobro popunjena, jerbo se ovdašnjen svitu nigdi ne priši, a naš brod stiže za malo višje od po ure. Znan da je Ina već u lagašnoj panici iako smo blizu porta. Zato namjerno usporavan raspremanje, promatrajuć je ispod oka, dok mi smišak lebdi na licu. „Jemaš li ča voća, a mogu li dobit koji kolačić?!“, upitan je molećivo i kako onda odbit svog dragog, da mu se srce ne zakrene. Naravski da me potla pitala za sok, jerbo je svoj popila, dok moj još uvik čuva ladnoću, ča joj posebno prija. „Ajde višje, sad ne stignen zapalit, jerbo privoz stiže, ča se čenjaš, jeli se ti misliš spakirat i obuć?“. Vidin da je vrag odni šalu, pa nevoljko požurin, na njezinu radost. Ma, deboto san bi siguran kako me pročitala, a zapravo se ni njoj ni išlo iz ovega pravega zemajskog raja. Poslidnja provira borši i našega jubavnog gnjizda da ni čagod ostalo, pojubac uz istinski osmih sriće i put pod noge. Njezin teški ruksak stavi san na škinu, boršu uze u ruke, a svak od nas jema je kape na glavi, ja naravski sa slikon Che Guevare! Ina me obgrlila oko pasa, pa smo tako pripijeni hodali do mula di će arivat brod. 


E, konačno je mogla sest na zidić u lučici i popušit barenko jedan španjulet, pa san je opet tanta kako smo prišili bez razloga...hehehhee. Malo daje od porta sinjali smo jednu lipu kuću s apartmanon i smišnon pizzerijon ispo' nje, tako da je odma pa dogovor kako ćemo idući put tamo. Nismo se ni ošrvali, a već se skupilo dosta svita koji putuje. Nažalost, višje nas ni moga zaklonit tamaris, ali je zato Inu boje od mene, štitila njezina kapa sa velin frontinon, jerbo je sunce taman pržilo sa te strane. Zato ča se ona rugala mojen šugamanu, ja san se smija njenon frontinu, koji bi moga pokrit dvi glave...ahahahhahaa. Inšoma, iz daljine se ču naš privoz, a ubrzo i vidi. 


Gužva u lučici, a i brod je bi dobro popunjen kad se košta uz mul. Mornar na skali nas je pripozna i odma pusti da ča prin najdemo mista. Šušur, komešanje i tiskanje prestalo je čin su judi zasili. Mi nasriću na naše katrige unutra, uz ponistru. Omamljeni i umorni od mora i sunca, zurili smo kroz otvorene ponistre ka našoj plaži sa sjetom, dok su brektaji motora udaljavali brod sve višje prima našemu lipon Splitu. Ina je naslonila svoju nježnu glavicu na moje rame, dok san je grli, ka da nan je zadnji put. Njezine vele, nestvarno lipe plave okice još jednon su čežnjivo pogledale moje, a naš spontani pojubac ni mogla spričit ni blizina naših kuriožnih suputnikov!



1 komentar :

Unknown kaže...

Vrlo lijep opis jednog ljetnog dana dvoje zaljubljenih, opis pun topline poput sunca koje je grijalo dvije mlade osobe. Izuzetno dobar tekst.

Objavi komentar

Hvala na vašem komentaru. Isti će biti objavljen nakon pregleda moderatora.