Rozin kutak

Briga o narodnome zdravlju!

Piše: Ela Ernoić  

E, nete me dobili da se vključim v javnu raspravu a se cepiti ili ne, kaj napraviti z necepljenima, preboljelima, cepljenima i onima koji se tak smatraju iak se več javne na društvenim mrežama išče tzv. jahke popularna v ono nek tak davne doba (a rečeno mi je nježno da još ni vreme o tome pripovedati) gda ste stali pred drugarice i drugove i javne se samoiskritizirali pa onda dobili 36 mesecov Lepeglave a ne tri lete (i ne mislite da ste tam vučili kekljati (čipkariti) ili pri pavlinima latinski).

Moram paziti kaj pišem, navek se najdem v problemima čak i pri najobičnijem intervjuu.

Tak sam kak student delala honorarno, napravila intervjua, dala ga autorizirati, Glavni ga je tiskal a onda ja sirota završila na profesorskom zboru a me buju ili ne buju hitili z Akademije jer se nekva spomenuta osoba v tuđim rečima osetila oštečenom.

No, moram priznati i ja sam male kriva jer kad me nazvala i objasnila mi ginekološki postupak pravljenja dece i kaj su mi eventualno tata i mama, lijepe sam osobu pitala kak ja koja imam dvajst let morem isprovocirati nju koja ima četerdeset pet.

Morti ju je to povredilo, ženama ni dobro kazati kolko su stare. No, z mog izbacivanja ni bile ništ morti i zate jer mi je profesor bil kak se to več zvale Sekretar KPH na toj instituciji.

Dakle, ja bum vama pripovedala kak se treba štiti od svakakvih pošasti boleština.

Kak perve, moram čestitati novoj vlasti v Glavnome gradu jer na skorem miljon stanovnika mamo čak sedem ili osem tzv. punktova za kalemljenje, tj. cepljenje a tu su i ljekarne kaj više ni ne primaju zainteresirane jer su v gužvi s obzirom da cepiti moreju sam doktori a ne kak v sretnoj zemlji, recimo, Holandiji, i medicinske sestre.

Ja se pitam a zakaj ni smeti zubarima cepiti, ak nam več rivlju v kožu lica i još kojekuda filere, botoxe, zmijske otrove, kaj fali v rukicu roknuti male Pfajzera, Zeneke, Đonsona ili Moderne pa da bumo moderni kak i ostatak nekvog dijela Evrope.

Ovak je užitak gledeti kak si jeni drugima dahću za vrat pri čekanju doze (perve, druge, treće, sedme ili četerdesete, ni bitno). Ljudi se napokon druže, izmjenjuju iskustva. O bolesti. Ne bolesti. Obnovi. Razmjenjuju brojeve telefona zidarov, vodoinstalaterov, plinara, dimnjačara. Po tome vidite da je obnova uspješna.

To se zove “vubiti z jenim udarcem dve do tri muhe”.

I onda mi najte pripovedati da “novi” nisu ništ napravili.

Kak nisu? Vugnuli su one robot-kante za smeće, potvrdili i produžili z uglednim gospodarstvenicima ugovore a znate i sami kak Knjižnica odrapi po žepu ak kasnite z povratom knjige.

Se v semu, ovo smo lete poskočili na lojtrici sretnih deržava za skorem trideset mesta i ve smo na dvajsšestom pa nam ostali moreju funt perja puhati v… leđa.

Sreča vam se izračunava po:

a)poverenju v sustav

b)očekivanom životnom vijeku

c)društvenoj potpori

d)darežljivosti iak ni navedeno čijoj.

Ja bi ipak male zažmirila na jeno i pol oko z obzirom na obzir da su anketu delali prek telefona kaj znači da naši ljudi koji žive ispod granice ili na granici siromaštva nisu ni mogli sudjelovati v raspravi.

Ja sam se preporodila od kad sam v penziji v koju sam ušla berzinom munje jer su se valjda prestrašili da bum se kandidirala za Intendanticu HNK Zagreb a bormeš su i imali razloga za strah.

Kak intendantica, ja bi sima dala saborske plaće i njihovo radno vreme jer po čemu su oni boljši od nas v Kazalištu?

Ne znate?

Njihovo je radno vreme fleksibino, jen se zastupnik hvalil kak je sam bil dva put v Saboru (nem napisala koji, neču da me opet hoče hititi od nekud, a njemu v obranu, morti ni ni znal di je Sabor), nišči im ne broji radne sate, ni im treba zemati bolovanje, ak preveč govore, mam ih prekinu (nigdar me nišči ni prekinul v sviranju solo violine kak god da sam se znojila od muke). Si lijepe nosiju maske, ručaju za jeftine nofce, vite da si moreju uštediti i za račune na Kajmanima, Đersiju, Sejšelima kaj nisu imena aligatora i štofa neg poreznih oaza, ili boljše rečeno ne-poreznih teritorija iak i odonud izidu kojekakvi dokumenti. Mi kak intelektualci opčeg širokog interesa volimo to zvati “Pandorinom kutijom” jer nutri ima i naših imena a kak da tam kak pisari ne delaju i ljudi z hrvatskim putovnicama!

Osim ak ne kockaju, onda moraju v Casino Royal v Černu Goru, kak Đejms Bond.

No, o narodnome zdravlju, di sam stala?

Je, neki me cijenjeni gospon (fakat se ne rugam) prozval da mu nek dokažem da pri nami fali doktorov a kak je v Danskoj, ha?

Onda sam mu ja z konkurentske firme prenijela link da nam bu skorem nestalo petsto liječnikov a i link službenog DZZO-a (Danske) kak oni delaju i kolke ih ma.

Pa ispada da se Danci kak jen sretan narod kak perve brinu o preventivi boleština ne baš kak mi jer mi smo pedantni pa na EMG, MG, ESCM, PBZ, i ostalo čekamo od dve do šest lete.

No, ipak bum vam otvoreno rekla kaj mislim o cepljenju:

to se dela v proljeće. Na odabranoga divljaka se različitim načinom vreže pa z vinogradarskim voskom zalepi mladi pup plemenite biljke. Čversto zveže gumicom da kaj ne procuri i onda zalije razrijeđenom gnojnicom kaj v principu male smerdi ali su rezultati odlični.

Obično se to dela i servira v dobrom društvu, pri kupici dobre kapljice i švedskome stolu.

A kaj je na njemu, ponuđeno je sima pa kome obojci a kome opanci (to ni v duhu kajkavskog ali pokušavam postati internacionalno razumljiva).

Vidim i da je gospon Gavran postal predsjednik Matice Hrvatske (a sam gramatički to dobro napisala?) kaj ima i nekvu simboliku.

Doduše ne izravno z nami osim ak se ne smatramo osim Irancima i potomcima Indijancev. Pravih, z Amerike.

Veliju tam da je gavran ljudima donesel svjetlo kaj se i mi nama nadamo.

A još više se nadamo da bu gospođa Gavran se to skupa zdržala jer ne pozabite, iza sakog uspješnog človeka stoji jaka i pametna žena.

Kak sam ja stajala i iza Stijene pa mi on sad daje podršku.

I za kraj, vščera nas je Zlatko Dalić (mene i sebe) fotkal kak selfi. Ali ni to ostalo v intimi nek je odma 24vur prenijel naše slike pod naslovom “Obožavateljica zaskočila izbornika za selfi!”.

Ja sam se uvredila, pervo zato jer nisam ja zaskočila njega neg se on sam ponudil da nas fotka, drugo, Stijena je kak moj menađer rekel da bi to bilo pametno, treče i najbitnije ja obožavam sam Stijenu.

Ostale cijenim. Kak Dalića (mi smo ga Varaždinci posvojili).

Ili ne. Kak one druge koje ni ne spominjem.

Ostanite zdravi i vesli i sretni, uprkos svemu, kak Danci.

Vaša navekvjerna lajfkoučerica

Ela Rozika