nedjelja, 30. kolovoza 2020.

Božica Jelušić | V morju trave


V morju trave plavam. Polne vrelo.
Z kapljom rose žeđu si utažim.
Jen mi pužek z trave maše :"Hello!".
Z lepezicom obraze si blažim.
Tu si srce smirim i prisnažim.

Se su misli lagane i blage.
Divlji bršljan po deblu se sfrkne.
Nevidečoj senci sledim trage.
Bogač-rogač z guščerom se strkne.
Čvrčki čvrče se dok se ne smrkne.

Vu dalšinu oblačeci lete.
Mlečecima narasle su brade.
Poljsko cvetje venčeca mi splete.
Heklan ropčec sako joko krade.
Hajda trepti kak šlajer od mlade.

Natura je naša dobra mati.
Ona časti i kosca i krivca.
Po gruđvama idu mravlji svati.
Srčem farbe do zadnjega živca,
Kak na sliki slavnoga naivca!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.