(tridesetpeta kratka priča pisana pretežno šoltanskim dijalektom)
Ko je moga mislit da ću, nakon jednega jedinega šuca, ohlebutit koliko san dug i širok isprid vrat od portuna. To me jutro mater poslala bacit škovace, dok mi se teplilo mliko prin skule. Na povratku isprid sebe ugledan komad zgužvane karte poput pravega baluna, a kako mi nikad vrag ni da mira, nisan moga odolit da ga ne podbijen nogon. Bi mi je u pravcu live, a ja san ga, više radi štosa, ka za nesriću, odluči opalit desnon. Brž san poslin prvi put s'vati, kako je uvik boje odlučit se za livicu negoli za desnicu... hehhehee. Ne sićan se je li bilo na cesti ništo klizavo ili san zamahnu jače nego ča je tribalo, inšoma, izgubin ravnotežu i bugnen svon snagon o pod. Ništo ka da me je reznulo po stumiku, no usta san odma i uz beštimje požuri doma. Naravski da se mater zabrinula, kad me vidila cilega od prašine, ali san joj sve objasni i uz pojubac je umiri.
Vrime je prolazilo i više se gotovo nisan sića pada, da me jedno jutro ni, baš u školi zaboli drob na deboto čudni način. Pipajuć stumik, ositin niku bolnu kvrgu povrh pupka. Ma, kako će jedan šesnajstogodišnjak slutit išta loše, jerbo su moje misli bile usmirene na sve drugo osin tega, uviren da će bol proć. Doista je tako slidećih dan i bilo, a onda me uvatilo dobro stezat, da se nisan moga ispravit, pa je odlazak likaru posta neminovnost. „Eeh Žele moj, dobi si herniju i morat ćemo te brzo operirat!“, odzvanjale su u meni riči poznatog spli'skog doktora, prijateja naše fameje. Tad san nauči da je hernija, zapravo pupčana kila, koja je resla kroz trbušnu ovojnicu, pa je bilo nužno ić pod nož. Ajmeee, jedno je operacija gjanduli u ditinjstvu, kad nisan ni bi svistan ča će mi činit, a drugo ova prva prava, sa totalnon narkozon. Stara bolnica usrid grada i vela soba na jugu, sa puno bolesnikov, postali su moj novi dom. Mojih šesnajst godin i nas šesnajst, svako sa svojon mukon, od mene najmlajeg, radi operacije kile, do najstarijeg, simpatičnog fetivog Splićanina, šjor Marasovića, koji će morat skinut jedan grubi madež sa čela.
Ni nan bilo teplo, a za tu cilu velu prostoriju, jemali smo samo legendarnu kalijevu peć, oko koje bi se pokretni znali skukurušit i grijat stare kosti. Mijun svakak'ih priči, smiha od srca i onega od muke, do kukanja i hrkanja, bila je naša nova stvarnost u nesvakidašnjoj, pomalo grotesknoj situaciji u kojoj smo se našli. Često promatrač, a manje sudionik, zavoli san sve te jude, pa mi se činilo da su doista moja rodbina. Vižite likarov i dolasci medicinskih sestar, gledajuć danas, bile su pravi mali teatar, sa njiman i nan ka publikon oliti glumciman, na ovoj svojevrsnoj pozornici života. Inšoma, doša je dan za rišit tu vražju kilu, pa su me rano ujutro odveli onako pristrašenog, uz pozdrave i dobre žeje svita iz sobe. Sićan se samo jedne moje Šoltanke, brž glavne medicinske sestre, koja me smiškom ispratila i ništo šapnula svojiman, dok su me na koliciman vodili u operacijsku salu. Koliko san tamo bi, teško je reć, ali virujen ne puno, jerbo san se razbuđiva uz pomoć sestar, već isto popodne.Veli flaster na drobu reka mi je sve, a riči podrške i vesela lica judi okolo mene, ulila snagu da mogu daje. Mejuto, oporavak ni baš iša po planu, pače, osića san bol i kad je po likarima ne bi smilo bit, jerbo je na previjanju sve izgledalo dobro, pa su mi niki znali reć da san prava mamina maza. Siguro je zapomaganje i jokanje dvojice bolesnikov sa obe strane do mene, šjor Nikole, dobrega priprostega gastarbajtera, operiranog od čira na želucu, oli kaštelanskega frajera Đirlića, kojemu su sredili hemoroide, pridonilo da se još višje pripadnen.
Mater i otac bili su već ozbiljno zabrinuti i odlučili tražit objašnjenje od likara. Kad bi mi došli u posite, skupa sa malin braton, parilo mi se kako san puno boje. Cila bi soba nikako zasjala, mater bi pričala sa judiman i nudila ih kolačiman, brat se hlihlišča i trka ka lud od sriće u vakon velon prostoru, a otac za njin. I onda jednega vedrega nediljnega jutra, kad je sunce svon svojon teplinon probilo naše ponistre, otvore se vrata i sestra mi širokin smiškon najavi positu. Jema san ča i vidit. Došla me positit moja kolegica iz razreda, draga i simpatična Ivanka, koju nikad ne bi očekiva! Ajmeee, ča su me zezali i normalno, odma je proglasili za moju curu, a ona se sva zacrljenila. Poklončić znak pažnje, riči ohrabrenja i njezin prikrasan osmih, odnili su me daje od ove bolničke sadašnjosti. I kad je otišla, još uvik mi ni bilo deboto ništa jasno, ali se dobro sićan kako poslin nisan ćuti gotovo nikaku bol. Otrpi san šale nikih iz sobe, ča san moga drugo, a ispod lancuna stiska šake od neočekivane sriće, koja me pojubila. Čak san zaboravi da popodne „Bili“ igraju derbi protiv „Dinama“ na Staremu placu i da smo se dogovorili slušat prinos sa jedinega tranzistora kojega smo jemali u sobi. Kad već ne mogu na utakmicu, onda barenko da ih minimalno dobijemo. Naravski, čin je Edo Pezzi započe komentirat utakmicu, svi u sobi pritvorili smo se u jedno uho. Moja silna radost zbog divnega jutra, ulipšana je velikon pobjedon nad tradicionalnin rivalon od 3:1 ! Doista, bi je ovo nezaboravni dan, pravi dan za pamćenje. Mejuto, kako su mi rekli, već sutra bi triba skidat punte, pa san zna da je prida mnon još jedna neprospavana noć, puna emocij, iščekivanja i nade!
Ko je moga mislit da ću, nakon jednega jedinega šuca, ohlebutit koliko san dug i širok isprid vrat od portuna. To me jutro mater poslala bacit škovace, dok mi se teplilo mliko prin skule. Na povratku isprid sebe ugledan komad zgužvane karte poput pravega baluna, a kako mi nikad vrag ni da mira, nisan moga odolit da ga ne podbijen nogon. Bi mi je u pravcu live, a ja san ga, više radi štosa, ka za nesriću, odluči opalit desnon. Brž san poslin prvi put s'vati, kako je uvik boje odlučit se za livicu negoli za desnicu... hehhehee. Ne sićan se je li bilo na cesti ništo klizavo ili san zamahnu jače nego ča je tribalo, inšoma, izgubin ravnotežu i bugnen svon snagon o pod. Ništo ka da me je reznulo po stumiku, no usta san odma i uz beštimje požuri doma. Naravski da se mater zabrinula, kad me vidila cilega od prašine, ali san joj sve objasni i uz pojubac je umiri.
Vrime je prolazilo i više se gotovo nisan sića pada, da me jedno jutro ni, baš u školi zaboli drob na deboto čudni način. Pipajuć stumik, ositin niku bolnu kvrgu povrh pupka. Ma, kako će jedan šesnajstogodišnjak slutit išta loše, jerbo su moje misli bile usmirene na sve drugo osin tega, uviren da će bol proć. Doista je tako slidećih dan i bilo, a onda me uvatilo dobro stezat, da se nisan moga ispravit, pa je odlazak likaru posta neminovnost. „Eeh Žele moj, dobi si herniju i morat ćemo te brzo operirat!“, odzvanjale su u meni riči poznatog spli'skog doktora, prijateja naše fameje. Tad san nauči da je hernija, zapravo pupčana kila, koja je resla kroz trbušnu ovojnicu, pa je bilo nužno ić pod nož. Ajmeee, jedno je operacija gjanduli u ditinjstvu, kad nisan ni bi svistan ča će mi činit, a drugo ova prva prava, sa totalnon narkozon. Stara bolnica usrid grada i vela soba na jugu, sa puno bolesnikov, postali su moj novi dom. Mojih šesnajst godin i nas šesnajst, svako sa svojon mukon, od mene najmlajeg, radi operacije kile, do najstarijeg, simpatičnog fetivog Splićanina, šjor Marasovića, koji će morat skinut jedan grubi madež sa čela.
Ni nan bilo teplo, a za tu cilu velu prostoriju, jemali smo samo legendarnu kalijevu peć, oko koje bi se pokretni znali skukurušit i grijat stare kosti. Mijun svakak'ih priči, smiha od srca i onega od muke, do kukanja i hrkanja, bila je naša nova stvarnost u nesvakidašnjoj, pomalo grotesknoj situaciji u kojoj smo se našli. Često promatrač, a manje sudionik, zavoli san sve te jude, pa mi se činilo da su doista moja rodbina. Vižite likarov i dolasci medicinskih sestar, gledajuć danas, bile su pravi mali teatar, sa njiman i nan ka publikon oliti glumciman, na ovoj svojevrsnoj pozornici života. Inšoma, doša je dan za rišit tu vražju kilu, pa su me rano ujutro odveli onako pristrašenog, uz pozdrave i dobre žeje svita iz sobe. Sićan se samo jedne moje Šoltanke, brž glavne medicinske sestre, koja me smiškom ispratila i ništo šapnula svojiman, dok su me na koliciman vodili u operacijsku salu. Koliko san tamo bi, teško je reć, ali virujen ne puno, jerbo san se razbuđiva uz pomoć sestar, već isto popodne.Veli flaster na drobu reka mi je sve, a riči podrške i vesela lica judi okolo mene, ulila snagu da mogu daje. Mejuto, oporavak ni baš iša po planu, pače, osića san bol i kad je po likarima ne bi smilo bit, jerbo je na previjanju sve izgledalo dobro, pa su mi niki znali reć da san prava mamina maza. Siguro je zapomaganje i jokanje dvojice bolesnikov sa obe strane do mene, šjor Nikole, dobrega priprostega gastarbajtera, operiranog od čira na želucu, oli kaštelanskega frajera Đirlića, kojemu su sredili hemoroide, pridonilo da se još višje pripadnen.
Mater i otac bili su već ozbiljno zabrinuti i odlučili tražit objašnjenje od likara. Kad bi mi došli u posite, skupa sa malin braton, parilo mi se kako san puno boje. Cila bi soba nikako zasjala, mater bi pričala sa judiman i nudila ih kolačiman, brat se hlihlišča i trka ka lud od sriće u vakon velon prostoru, a otac za njin. I onda jednega vedrega nediljnega jutra, kad je sunce svon svojon teplinon probilo naše ponistre, otvore se vrata i sestra mi širokin smiškon najavi positu. Jema san ča i vidit. Došla me positit moja kolegica iz razreda, draga i simpatična Ivanka, koju nikad ne bi očekiva! Ajmeee, ča su me zezali i normalno, odma je proglasili za moju curu, a ona se sva zacrljenila. Poklončić znak pažnje, riči ohrabrenja i njezin prikrasan osmih, odnili su me daje od ove bolničke sadašnjosti. I kad je otišla, još uvik mi ni bilo deboto ništa jasno, ali se dobro sićan kako poslin nisan ćuti gotovo nikaku bol. Otrpi san šale nikih iz sobe, ča san moga drugo, a ispod lancuna stiska šake od neočekivane sriće, koja me pojubila. Čak san zaboravi da popodne „Bili“ igraju derbi protiv „Dinama“ na Staremu placu i da smo se dogovorili slušat prinos sa jedinega tranzistora kojega smo jemali u sobi. Kad već ne mogu na utakmicu, onda barenko da ih minimalno dobijemo. Naravski, čin je Edo Pezzi započe komentirat utakmicu, svi u sobi pritvorili smo se u jedno uho. Moja silna radost zbog divnega jutra, ulipšana je velikon pobjedon nad tradicionalnin rivalon od 3:1 ! Doista, bi je ovo nezaboravni dan, pravi dan za pamćenje. Mejuto, kako su mi rekli, već sutra bi triba skidat punte, pa san zna da je prida mnon još jedna neprospavana noć, puna emocij, iščekivanja i nade!
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.