četvrtak, 28. studenoga 2019.

Željko Bilankov | Kako san posta prvašić


(11-ta kratka priča pisana pretežno šoltanskim dijalektom)

Ko je misli o skuli, kad mi je samo bezbrižna igra bila na pameti. Tek san doša sa Šolte, di mi je bilo ka u bumbaku, okružen nemirljivon jubavju mojih najdražih, a sad moran u Split, u niki prvi razred. Od malih nog nisan voli da me prisiljavaju na bilo ča i upozoravaju: „Žele ovo, Žele ono!“ Nemojte mislit kako ne bi posluša, jerbo san ima rišpeta, ali teškon mukon i jedva bi čeka da to obavin, a onda jopet po svome. Ma, lipo san crta ka mali, govorili su mi da iman dara, ali drugo su slova, riči, brojevi i ko zna ča još u skuli, ajmeee. Mejuto, baš ta slova, odnosno riči, obiližili su moje sridnjoškolsko doba, odrastanje i cili život, kroz enigmatiku i pisanje u ovin, kako znaju reć, zrilin godinan,..dok su brojevi bili nezaminjivi dil mog posla u Splitskoj banci. Eeh, ka da je sad, sićan se tog prvog dana skule, do koje su me dopratile mater i prijatejica iz ditinjstva, susida u Kninskoj ulici, di smo stanovali, uvik nasmijana Dunja.
Izjubile me i predale učitejici, a potla ćirile kroz ponistru od razreda. Čin san ih spazi, suzice su krenule, a ja se zasrami i spusti glavu. Odma je učitejica priskočila, ali također i niki iz razreda, koji su mi svojon vedrinon vratili osmih na lice. Ne sićan se daje ničega, jerbo je očito ti prvi dan skule, bi dan upoznavanja i ništa više...Kako su tekli dani, tribalo je zagrijat katridu, ča mi je bilo najteže...a, ima san osićaj da sidin na iglan. Otac bi stavi isprid mene niku ondašnju vrst radne bilježnice, koja je imala slike svačega, a ispod njih tribalo je napisat ča je na sliki. Prvo san mora napisat ča vidin, ako ne znan, triban napisat uz pomoć roditeja, ovi put oca, pa pročitat slovo po slovo, a onda spojit u pravu rič...i gledan ja lipu sliku jednog cabla, a otac mi to pokazuje i govori: „Ajde Žele piši,..b - o - r!“ i ja napišen, a on će: „Čitaj slovo po slovo!“, ja pročitan slovo po slovo: „B – o – r“ i on me upita: „A sve skupa?“, na to ja ka iz puške, umisto bor, sav sritan kliknem: „Čemprs!“ ahhahaaaha. Ma, kako će dojučerašnji mali Šoltanin zaboravit „materinji“ jazik i razmišljat, oliti govorit književno, kad san najviše zapamti čemprese, jerbo ih je bilo puno u selu, tamo di smo se volili igrat. Lako se meni sad nasmijat tomu, ali onda san skoro ovanca, otac je zabeštima i gotovo mi glavu zabi u teku. Nestrpjivo je okrenu novu stranicu, a na njoj slika najobičnije čaše, jopet sve isto, a ja na kraju spojin ono č - a - š – a, u trijumfalno: „Žmul!“ ☺...gotovo je poludi, pa mi zbroji sve po spisku i reka: „Jebenti tebe i Šoltu!“ ihihihihiiihi.

Nastavilo se to i vanka, kad bi mater, otac i ja, šetali po rivi, ali u malo drugačijoj varijanti. Jedanput mi reče: “Ajde, čitaj ona slova gori!“, a pisalo je T – I – T – O, na našemu Marjanu. Naravno, ja pročitan kako triba, a kad mi je reka: „Sve skupa?“, isprve san ispali: „Marjan!“ ☺ ...od muke su se i oni nasmijali, ka i ja, misleći, kako ih činin sritne. Zato san odmah kaza ocu da ću pročitat natpis na jednoj metalnoj bačvi, koja se, skupa sa drugin bačvan, nalazaila na gatu, prin nego bude ukrcana na niki brod. Inšoma, ja razgovitno čitan ča je pisalo na njoj : „D – U – G – A“ i onda sve zajedno, već pomalo legendarno viknen: „Bačva!!!“

Eto, tako to biva, kad razigrano dite, mali otočanin „iznenada“ dođe u veliki grad, a srce i duša mu ostanu na škoju, koji je toliko voli. Ta jubav ni nestala ni danas,..štaviše zrilija je i jača nego ikad!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.