Kajkavsko najže (8): Božična čestitka

Piše: Aleksandar Horvat

Dugo nisem bil na najžu. O, ima leto dni, i više. Dohaja Božič. Morti bi mogel onoga “oldtajmer” biciklina dopelati v red pak ga nekomu dati, na dar. Vu vuglu najža je stara, prašna, rasklimana psiha z potrtim špiglinom i jenim ladlinom bez ručke. Tu bi negdi v ladlinu trebal biti bunt ganc novih špici za kotač. Prekapam med šrafima i kojekakvim sitnim železnim delima. Prašina me žegeče po nosu, pak kihnem i samo još več prašine spuhnem. Kak sem zdigel staru plehnatu piksu od štacunjskih kolači da vidim kaj se vu nji skriva, pod njom, pozablena, ili morti zgublena, čestitka za Božič.

Lepa je. Nigdi se ne vidi nikakvo leto, niti datum se nemre rezeznati. Veli internet da su tridesetih let v naši domovini razglednice postale hit, pak z njima i čestitke. Tak je i ova moja negdi z toga vremena med dva rate. Na strani na koji se piše je vlaga vse pobrisala, jedva se vidi “Draga…” i nekakvo ime. Moglo biti Milica. Tak se zvala babica. Morti je to deda, onda dečko, svoji mladi puci čestital Božiča. Na voglu je nešče nekaj zapisal, ne razmem kaj, a trag od kave ili čaja je slučajno, ali zgodno, zaokružil cirkvu na sliki. Poštanske marke, zanimlivo - nema...

Dok tak nekaj primem v ruke, kostrešim se, čini mi se kak v takvim skritim i pozablenim sitnicama dremle nekakvi duh koji pamti se svoje vreme i ljude. I dok to doteknem, vse se to nekak magično preleje v mene, kak da sem z nekakvim vremeplovom na jen čas prešel v stari svet, dok me na njemu još ni bilo. I mislim si kak je baš ta čestitka negda bila lepa i ganc nova, z štacuna, dok ju je dečec Matija kupil i škrakavim pismom na drugi strani nekaj pisal. Kaj bi mogel napisati? “Draga Milica, od sega srca svojega Ti želim blagoslovlen Božič. Imam te rad. Tvoj Matija!”. I onda je to ne mogel poslati prek pismonoše, kajti bi drugač si pre hiži vidli i zeznali, nego ga je sam predal z roke v roku, z kušlecom i zagrljajem, morti i z kakvim friško odrezanim, črlenim, starinskim šipkom. Zato čestitka i nema marku. Ne znam če je tak bilo ili ne, ali - moglo je biti, tak sam si premislil.

I sam se zmislim da je pred pedeset let bil pun stol božičnih i novoletnih čestitki. Dvajst smo kupili i poslali, ne ja nego moji doma, a još več smo dobili. Ja sem bil zaduženi za lizanje marki i slabi tek mi je ostal i drugi den. A vse je to bilo lepše i bole ljudski. Dok je došla čestitka, znal si da te se negdo zmislil, da si je sel pred tu karticu i potrošil pet minut da ti napiše par reči, ze svojom rokom, ze svoje glave, znal si da ti zna adresu, gde si doma i da te navek more dojti glet. Ne bum ponavlal kak je denes. Jenu čestitku fkradneš na medmrežju, deneš ju v mobitel i onda letima i letima pošilaš jeno te isto, jenim te istim ljudima, v tri sekunde. Negda si na kiosku več časa zbiral čestitku koju buš kupil nego ti denes treba da pošleš na dvesto i več ljudi. A ove papirnate čestitke smo negda čak naslagali i na bor, med kuglice, vatu i cukorne bombone, vse su bile zanimlive i krasne.

Točno me malo prime nostalgija za tim vremenima i znam da bum jenoga dana pukel i poslal z poštom celi bunt papirnatih čestitki, z ufanjem da se budu primiteli fest i lepo iznenadili i da jim bu drago kaj je i njima došel dobri duh prešlosti. Još da bi imel listonošu kaj bi z biciklinom sakomu došel pred hižu i zatrubil v onu trubenticu, to bi bilo točno kak negda, od čoveka do čoveka, z roke v roku, od srca k srcu.

Gledim nazaj to sliku i mislim si na of trag od kave. Ta je čestitka ne bila nekam pospravlena za stalno, nigdi gde bi mogla tak “nastradati“. Bila je negdi na stolu, na “vidiku“, bliže srcu, v sakodnevici. Morti je vuz obitelske vrednosti Božiča vu nji zapraf bila i ona druga lubav, ljudska, koja je grela srca. Čestitka bi jenoga dana završila negdi skrita ili hičena, pak bi zginula z ovoga sveta kak i se druge papirnate čestitke kojih več letima ni. A morti ju je baš lubav, na nji zapisana, spasila od smetja, pak je takva kakva je bila, završila pod piksom od kolači, v ladlinu, v staroj klecavoj psihi, v kmičnem vuglu, na najžu. Morti je tu bila skrita, a morti je bila i pospravlena da ju nešče najde i nad njom se zamisli.

Dost je cajta več bila v kmici. Zel bum ju zato sobom i složil v ramicu na zid kak ukras, kaj bu furt zmišlavala kak je Božič zgledal negda, i da sam i ja na tem svetu morti baš radi te jene jedine čestitke.

(A. Horvat 12/2023.)