Željko Bilankov | Trešeta

(četrdesetprva kratka priča pisana pretežno šoltanskim dijalektom)

Brž je bilo deset uri navečer, vrime kad su mnogi u Grohotan već odavno u posteji. Samo je u Bukteničinu dvoru, pače na njiovoj gustrini, budno nikoliko naizgled nervožastih judi ča se muvaju po njoj, side za stolon oliti stoje na nogan i mejusobno pripovidaju. Iluminacija jedne žaruje u totalnoj tmini oko nas i ritki huk čuvite uza sve to, stvara situaciju koja neodoljivo podsića na scenografiju kasne litnje pridstave u našen selu. Naravski tema je partija trešete, o kojoj deboto ovisi život! Mi smo zapravo jedva dočekali da iznenadni noćni posjetitelji pođu u krpe i nas kartaše napokon puste na miru. Ma, jasno je bilo i njiman da smo ka zapete puške, ali se ipak nisu mogli načudit našoj strasti za igron. Inšoma, nakon grintave Nebojšine matere, često kisele tete Marice, poslidnji nas je pozdravi njezin decentni zet Pavle. Ne bi se začudi da je, danas već istaknuti hrvatski književnik, baš tad dobi ideju za niku novu priču, sudilujuć i sam u ovoj neorealističnoj atmosferi onkraj stvarnosti.

Mista su zauzeta, vino, voda i sirup na stolu, lagano iščekivanje u zraku i Zoran započne sa mišanjen, na svoj specifičan način, zbog iskrivjenog položaja ruku i sporosti diljenja. Zlatko mu je odma sa smiškon pribotuna, kako je niki dugo miša karte, pa je umra...hahahha. Na njegovu žalost, ni to mu, odnosno to in ni pomoglo, jerbo su nastavili gubit. Ni ja nisan zaboravi, svoju staru „dobru“ naviku, da mu, kad ne pazi, popijen svu vodu, kako ne bi moga napravit bevandu...ihihihiihhii. Bidni su bucali i sa motiman, koje su tobože naučili specijalno za trešetu, a sastojali su se od diranja svih dilova lica, pa smo se samo mogli smijat do suza kad bi se potegli za nos, a tribalo je čapat uho!

Inšoma, sve višje mi se parilo da ne čujen ništa osin zvuka bačene karte i poteza lapiša, kad bi Zlatko biliži punte. Zoran je vrti glavon od muke, Nebojša ziva sve u šesnajst, a oči su mu bile na po kopja, dok smo in mi dobro odmakli, pa igra doista višje ni imala smisla. Gotovo u isto vrime zvono na crikvi otkucalo je ponoća, pa je bilo pravo vrime da se prijatejski pozdravimo. Dok smo iza nas čuli, kako se još mejusobno krste „lipin“ ričiman, bat naših korak potira bi poneku zalutalu mašku kroz sablasno puste ulice našega malega mista. Nigdi žive duše, a bome ne mogu lagat, da se nisan boja oću li srest i kojeg mrtvog, opterećen raznin stravičnin pričan, kojih san se od starijih nasluša kroz cilo ditinjstvo! Možda se prijatej Zlatko ni straši, ma srića ga je put do njegovih vodi priko mojih, pa mi je bilo lagje. Kad je zamaka u tamu, a ja se u strahu ošrva oko sebe, ču san kako se otvaraju škure na gornjen podu bakine kuće i odma je slidilo ono: „Nesriknji sinko, di si dosad, je li znaš koja je ura, oli si poludi?!“ Ma, kolikogod da me je napala, toliko mi je bilo drago da me zazvala u ovoj nevirovatnoj tišini osvitljenog trgića sa tek jednin jedinin feralon. „Eto me, bako, začas san gori, oprosti“, ma tribalo je još proć okolo kuće, onda kroz dvor i skalan na balaturu pripunu tetinog cvića, pa u kuću. Požuri san, ali ka i uvik, zasta isprid prve skaline, jerbo mi je pogled na mračinu ispod volta, a isprid vrat od konobe, oduze noge. Kadgod bi tu prolazi, ka da san potajno želi vidit moga dragog pokojnog didu, a jopet san se tega boja. Inšoma, u par skokova priko skalini, uletin u kuću i brzo zakrakunan vrata, dok mi je srce kucalo deboto u grlu.

Teta je spavala u donjoj kamari, umorna nakon popodnevne smine u pogonu „Jugoplastike“, di je radila najteži posal na pećiman za balune, pa ništa ni čula, a ja san se, da je ne probudin, polako penja uza stare škripave drvene skale na gornji pod. Baka me dočekala, već nekako smirenija, ali još malo ljuta, no kad smo se zagrlili, ositi san koliko me istinski voli. Prid spavanje, uvik bi, uz šteriku isprid malog zrcala, raspustila duge pletenice svoje lipe side kose, češjala se i onda se u biloj spavaćici zavukla u posteju. Ona je spavala u bračnon krevetu sa starin kočetan, u kojoj već puno godini ni bilo dida i ponekad mi se činilo da tiho joče. Ja san leža u posteji do nje, a ponistre su bile pritvorene, jerbo nan je tribalo arje u toj teploj litnjoj noći. San mi ni dolazi i čulo se tek, kako baka moli svetoga Antu Padovanskog, sveca kojeg je toliko štovala. Bila je prava, iskonska virnica, a ne ka mnogi danas, jerbo je živila viru svaki dan i širila jubav meju svima. Moje misli, pače, bile su vezane za našu igru i ugodnu večer kod naših Buktenic, kao bi baka znala reć, a osmih mi ni silazi s lica ni u posteji. Mejuto, zna san da sutra moran na Rogač, kod matere, oca i malega brata i nije da mi ni bilo drago, ali selo je selo, tu je jednon zauvik pohranjeno moje srce, tu san se uvik osića spokojan i sritan, mažen i pažen od mojih najdražih!