nedjelja, 12. travnja 2020.

Siniša Cmrk | Čija muka vekša?

Nemrem spati, a nemrem ni bdeti,
štel bi se ž Njim moliti, al mi se, pak, spi.
Štel bi skupa ž Njim nase brige Sveta zeti,
a do ranja ga bom zatajil kak Peter, i si.

I sluga sem kojemu fali od mača vuho
i čavel kojega sem zatiral čez Njegvo meso,
i on kaj hital je kocko za Njegvo ruho,
a On, otpiral je, baš i za me, svojom krvi Neba leso.

Se moje muke neso vredne kak Njegva jena vlas,
niti jena kaple kapla od presvete Njegve krvi.
Za se muke svoje On tak malo išče, a ponuđa spas
dok nas Život dole vleče, dok nas gnjete, dok nas mrvi.

Nemrem spati, a nemrem ni bdeti,
molitve su se vtihle i kak da proč bežiju.
Nemrem svoje grehe vun z duše ja ve zeti,
obračam znake kaj na samo moji cesti ve ležiju.

Kulk’o put ga bom prosil, a potlam mam zabil,
kul’ko put bom ga iskal pak platil nigdar?
Kulk’o put bom i sam koplje vu telo mu nabil,
kulk’o put bom štel sluga biti, al i gospodar?

Pak kul’ko put bom štel sluga biti, al i gospodar?

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.