Željko Bilankov | Od upale gjanduli do mortadele

(dvadesetšesta kratka priča pisana pretežno šoltanskim dijalektom)

Jema san samo šest godin, kad su me odveli u bolnicu na operaciju gjanduli, ka i mnogu dicu u to vrime. Onako malešan, okružen stalnon pažnjon medicinskih sestar i naravski mojin najbližima, nisan zapravo ni s'vaća di san i ča me čeka. A smistili su me, sa još nikoliko mularije, u puno smišnu sobu s pogledon na procvitali Vidovićev park. Kroz našu velu, često otvorenu ponistru, ulizali su lipi vonji prolića, dok je radosni cvrkut tic drugova s nan, gotovo cili dan. Zna bi se uspet na prste da pogledan prima parku, oli na trotoar ispod i mahat nepoznaton svitu, a sve u žeji da vidin nikoga svoga.

Moglo se onda doć u vižite bilokad, pogotovo na dičji odjel, pa je naša soba uvik vrvila od judi. Naravski, većinon su to bili roditeji, oboružani svakojakin darovima. Tako su i meni moji donili, izmeju ostalog, igrašku koju san najviše voli, oni modri vlakić na baterije. Potla smo se mi u sobi razminivali sa poklonima, jerbo nan nikad ni bilo dosta igre, ma smo morali bit mirno i kuco, kad je dolazi doktor, a ponekad i stroga sestra, koje smo se bojali. Jednon san dobi lavadu od take, kad mi je iz ruke ispala čikara sa pinkicu teplega čaja i prolila se po podu. Bidnoga me svlada umor, pa san popodne zakunja na posteji, nesvistan da ništo pijen. Skoro su mi potekle suze, ali joj za dišpet nisan da gušta. Inšoma, došlo je vrime za operaciju gjanduli oliti angini, koje su me u zadnje vrime mučile, jerbo nisan moga progucat ni mrvicu hrane, a da ne zajočen. Sićan se dobro, kako me je ovi put, svima draga sestra, odvela u jednu veću, drukčiju sobu sa nikon, meni se činilo, dugon bilon postejon na kola, svakakin medicinskin alaton i likarijan. Tamo me dočeka nasmijan doktor, sa velon traveršon, ka da je mesar...hahhahaha, vaze u ruke i stavi sebi na kolina. Ne pamtin ča mi je priča, a danas znan da me je ti zabavit i opustit, dok su istovrimeno za me, u sakrito pripremali takozvanu masku za uspavljivanje. Dugo poslin tega misli san o trenutku iznenađenja kad mi je odjednon na lice prisloni to čudo i nikako mi ni moga nestat iz nosa miris tekućine, s kojon san zaspa prin operacije. Sve je dobro ča se dobro svrši, pa su tako i meni izgulili tega vraga od gjanduli, na obostrano zadovojstvo. Nisu me pustili odma doma, ka ča danas začas potiraju jude, a da još nisu ni došli sebi od pustih šokov u bolnici. Jema san svu pažnju, vrlo brzo mi je bilo boje, ali nisan smi ništa jist.

Mejuto, sudbina je tila da mi mater baš tih dan, završi u istu bolnicu, jerbo je, iako mlada i zdrava, imala niko priskakanje srca. Nikad neću zazaboravit, kako san je, sad ja sa ocen, u pratnji medicinske sestre, doša vidit na odjelu di je ležala u pidžamici i papučan ča mi je ona kupila. Kad nas je vidila ni mogla zadržat suze, a ja san joj poleti u zagrljaj na posteji, pojubi je i poželi sriću. Nismo puno ostali kod nje, ka ni ona u bolnici, jerbo joj se srce smirilo, pa su mamu već sutra poslali ča. Ja virujen da je ozdravila čin se uvirila kako san dobro. U Kninskoj ulici, di smo tad živili, sprema se pravi doček kad izađen, a to je bilo za manje od dva dana. Još uvik je trajala zabrana kad san napokon doša doma, ali ovi put nisan smi jist ništa osim juhice i kašic. Ma, zabrane se donose zato da se krše...hehhhehe, pa san silno poželi i utiho zamoli mater da mi barenko da fetu-dvi mortadele i kruva! Ni se mogla čudon načudit, jerbo je znala da judi nisu u stanju petnajst dan ništa stavit u justa, a ja bi sad, ni manje ni više nego malo salama, koji još ima u sebi i papra. Ipak, tako mi se milo nasmijala i to je bi znak da će mi ispunit žeju, ka i puno puti dotad. Kako san samo brzo proguca kruv i mortadelu i to s kojin gušton, ka da jin najslasniju deliciju na svitu, makar me malkice zabolilo grlo. Onda je široko nasmijana, sela do mene na posteju, čvrsto me stisnula uza se i pomilovala po kosici. Ništa mi višje u temu času ni tribalo, pa san poželi da zagrljaj traje vično. Eeh,  moja dobra i draga majko, di si nan danas...nema te, a znaš li da mi strašno fališ, da mi nedostaje tvoj divni lik, tvoja vedrina i životni optimizam, tvoja snaga, širina duše i teplina srca za svih nas!