Đurđa Vukelić-Rožić | Bela kuta

Sedim ja na dugačkoj, zlizanoj drvenoj klupi pred belim vratima ordinacije jene stare bolnice, kaj je jezera i jezera bolesnikov lečila. Interna kirurgija, vnutrašnji posli. Trebalo je iti pod nož. Ni mi se išlo, po pravici, no več sem tak dugo trpela tu žuč i išla mi je na živce ili vice versa, kak bi se to po učenomu reklo. Šoder se v njoj naredil i to jako puno, me je Jožek štental da bi trebalo most pokrpati z njim. Trpela bi ja, i samo sira z makaronima jela, to ni problem, nek sem požutela!

Bila sem žuta kaj, ma, š čim bi to spodobila? I meršava. Slaba. Nis mogla delati.

Vručina me je držala, žuč se vupalila, zimlica me je drmala, i to bome fajn. Moja doktorica mi je prepisala inekcije Garamycina, još danes imam implante orehov tam ispod bubregov od njih. Tu sestru bum još pitala za zdravle, kak mi je to tam pikala?

Z toga zlizanoga dreva bolničke klupe, više straha svih bivših pacijentov ide na me, nek z mene na klupu. Čas si mislim kaj bu bu, deca su odrasla, otišla, imaju svoje familije, hiže, posle, več me ne trebaju. Otiti se z ovega sveta mora, štela ne štela. Kak vsi tak i baba Ifkica. Deda bi si brzo našel utehu, tam je ona stara cura Milkica kaj je doma ostala, nemre se dočekati udovca, radi penzije. Pak

onda udovica Kata, navek mu se šmajhlala, baš kak mačka. Ne bu on dugo sam. Razrešena vsega, lepo sem čekala, moja budučnost je v božjim i kirurgovim rukami.

Če se preselim na ti obečani bolši svet, samo bi štela da ljudi budu dobri prema mojimi kravicami, tuliku su moju decu odranile! Več je i podne prešlo. Sestra je rekla da doktor operira i bome ga dugo ni bilo. More biti da sem se zgubila v svojim mislima. Otprla su se vrata, gospon doktor je zišel van z ordinacije, a ja jedina na toj klupi. V čošek sem se stisnula kak jeden jedini čvarek vu kotlu punom vruče masti, gda se cvrli. V meni je strah drmal vsaki milimeter kosti i kože, a pred menum je stal   dečec v klompami, lepi kak bombon. Če sem i posložila nekaj kaj bi podsečalo na osmeha, držim da je to zgledelo kak da je neko hastermana povlekel za vuvo. A pak, znam ja da te bele kute računaju na naš strah i samo se delaju da ga ni. To valda pomaže vsima. Gda bi ga vidla v tramvaju, onak bez kute, dečeca kaj žvače žvakaču a morti bi i mobiteleral, bome ga se ne bi bojala. A ovak ...

– Mene čekate?

– Mmmislim da da!

– Uđite!

– Fala, gospon doktor!

– Sjednite!

– Fala.

– Da vidim papire.

– Izvolite.

– Hvala. To mogu uzeti brzo, vidim da ste upalu smirili. Bili ste na moru?

– Ne.

– Udati ste? Imate djece?

– Da. Odrasla su i svoji ljudi.

– Otiđite sa suprugom na more, a ja ću vas nazvati čim bude slobodan krevet.

Štela sem mu reči da nemamu peneze za na more iti, i da dedu trideset let ni palo na pamet da bi mogli nekam skup malo otiti, a kam na more. Gda bi ja kaj rekla on bi mi zaprl vsaku nadu, jer da je šteta peneze na more hitati.

Naj gledim televiziju ili bi se delal da me ne čuje, onak podmuklo. Tema bi krepala, a ja sem se grizla, nes pozabila na stvar. Da smu k sestrični Zlati išli, na Hvar, ne bi joj bili nikaj dužni. Je pri nami rasla. No, čkomela sem, ni to doktoruva briga, to sem sama trebala rešiti i spremeniti gda su još za to bili cajti. Kesno je popoldan iti na jutrošnju mešu.

– Oprostite, kak mislite, trebam iti na more?

– Samo vi mene poslušajte, ta ljeto je, svi idu na godišnji. Otputujte na more, prelijepo je ovo ljeto, a more toplo. Ja ću vas nazvati telefonom, kad se oslobodi mjesto, da dođete u bolnicu. Lijepo se odmorite, kupajte, držite dijetu i zaboravite na operaciju.

Celo vreme sem vu fasciklinu na svemu krilu premetala kuvertu s petsto nemačkih marki v komadu. Rekli su mi v selu da je moram dati gosponu doktoru koji me bu operiral. Onak med paperima. A ja sirota nis znala kak bi to naredila a i bilo mi je žal tih penez, smu je posudili i trebalo je bu vrnuti. A

če bi mrla, bu trebalo za mega lesa. Drugo, če preživim, ti nam penezi budu trebali.

Popis ne bi stal na dva arka trgovačkoga papera. Štelo mi se nove kuperte za na kauča, nekaj da imam kam oko hititi. Pak sem štela kupiti Jožeku novu košulu a i čižme za v štalu su mu trebale, kak i meni. Za Božič dojdu vsa ta deca, nekaj je treba i njima prirediti. Heklala sem i štrikala kaj im bum pod boreka dela, ali čokoladu nigda niko ni rekel da neče! Krovek na štali curi, vodovod nikak da dojde, treba bu još jen zdenec kopati, vode ni. Tak ja premečem te marke, one ždereju mene i ja nje.

Mislim si, kaj ak je to pošteni čovek, ti gospon doktor kirurg? Kaj ak ga bum uvredila, bum se osramotila!? Ak ni, morti je tih petsto marki premalo mita! Onda si premišlam, če kakvi poduzetnik ili bogataš treba na operaciju, naj on namiri doktora i za nas siromake, če treba. Vsekaj mi se motalo po glavi.

Vse smu se lepo dogovorili gospon doktor i ja, morala sem mu obečati da pemo na more. A morti je videl zmučenu sirotu... morti je i njegva babica, babica kak sem si i sama? Več sem v glavi delala rasporede; ko bu ranil blago, ko bu dojil, ko bu živad zatvaral, dok je on pisal kaj je mislil da je treba pisati.

Ni bez vraga da nejdeš nikam gda imaš gospodarstvo! Vse to ostaviti! Pa kak bi ja sedela tam v moru ili na pesku a da ne mislim na svoje kravice i kokice? Kaj ak se svinami kaj zgodi, kaj bumu sušili, deci dali? Nemrem si ni zamisliti da deda guta suhe žgance, bez prepečenoga suhoga špeka! Ja sem volela marvu za koju sem skrbela.

Istina, morali smu je zaklati i pojelo se. No, da se nesmu za nje starali, i za roditele im, oni ne bi ovoga sveta vidli. A gda su več tu, ja sem pripovedala z njima, dragala je, česala, prala, bili su v teplom i čistom. Pred kolijne sem se oprostila z njima i ni mi bili sejedno. Ni vsega bilo kak danes, ak nesi blago i živad ranil, krepal bi od gladi. Moralo se živeti tak kak se živelo. Iskala sem ravnotežu vu svemu živlejnu, i morem reči da to opče ni bilo lehko, ti kompromisi. Če imaš osečaje, imaš!

Gda sem zišla van z ordinacije, na klupi je sedel moj deda i čekal na me.

Mirišal je po crlenomu luku, otišel je na čevape tam vu pečenarnicu, više bolnice gda sem se ja na klupi cvrlila, gladna od te dijete kak vuk. I pivicu si je spil, ni on sebi mačeha.

– I?

– Moramo iti na more.

– Kaj?

– Doktor je rekel da odemo na more, a on bu zval gda trebam dojti na

operaciju.

– A kaj nemremo biti doma gda nazove?

– Ja ti velim kaj mi je rekel.

– A gde bumu zeli peneze za more?

– Od mita.

– Aha, te je podmitil kaj peš na more? Nekaj novoga. A jel ti morti i kluče od svoje vikendice dal? Žena božja, a ko bu blago i hižu čuval?

– Deca. Naj si narede rasporede i dojdu doma biti od koristi. Naj zemeju godišnji.

Za vse dojde vreme, tak i za to.

– A ne bi ti išla sama z decum?

– Ne, doktor je pital jel imam dece, ja sem rekla da su odrasli i otišli, a on je zaklučil da mi dva trebamo iti na more.

– I to bu tebe zlečilo?

– Ja ti samo velim kaj je on rekel.

– A da se nesi tak gospodski oblekla i flizuru naredila, bi čovek razmel da imaš doma krave i ne bi te slal na more!

– Daj, naj. To je jedini kostim kaj imam još dok sem se udavala! Kaj sem trebala, z fertunom, šarom kiklom i čižmama za v štalu dojti v bolnicu? I kravice doterati da su mi na oku?

Sad, gda gledim na vse to, oče mi se smijati. Na moru nam je bilo jako lepo, to je bilo prvi put da smu nekam išli, kak smu se venčali. Operacija je dobro prešla, peneze nesmu vračali, deca su saki nekaj malo dala na vrpu i otplatila naš dug susedu žmuklaru. Jožeku sem kupila lepu prugastu piđamu i plavu košulu, tak plavu kak njegve oči. Dok smu bili na moru, deca su popravila krovek na štali, pokosili su i zbalerali seno. Došli su bageri i počeli vodovoda pelati v naše selo. Za Božič su došla deca, puna nas je hiža bila i malo mita sem priredila za vsakoga, kaj bi nam pak došli. I tak si mislim, mreti se mora, a zakaj onda ne narediti nekaj lepoga ze živlejnja? Z dana vu dan, čez vsaku vuru, minutu? Am to baš niš ne košta!