srijeda, 26. svibnja 2021.

Željko Bajza | Kralevstve duha


Borim se z mačem i nis navčen bežanju. Morame misliti kak bi svoje dele, mogli proti sakoj zlobi i nemarnosti pustaviti. Oni se pak hočeju z mužiku i z pesmu zabavljati i z gizdavemi opravami cifrati, pak z našu kulturu kralevstve nebeske zadobiti i dušne zveličenje poiskati. Vnoge mene takvi skrbe. Ake želi človek srečen biti, iskati navuk treba od povoja pak du groba. Nesme mi pijanci, lakomci, gizdavci koji dan i noč druge ne delaju i ne misle, niti se za druge ne brigaju, neg kak bi mogli svojemu grlu i želucu vugoditi zebranemi vini i jestvinami. - Ponavlje za menu: Same oni ki su z nami spremni se po dobru pariti ti i takovi mogu se za krščenike deržati i imenuvati. Kad ljudi nebi imeli duha, bili bi kak mravci grube jednaki (rough equal). – Wright-je človek kak kompleks mogučnosti. Človek je sloboden, ali i odgovoren za svoje čine.

Gda je Augustin mislil da je zemaljske carstve meste zla i poroka, Zaharija je napisal: “Johanes erit nomen eius.” Oslobodi nas i ud raspeča, i ud križa, i ud groba, i ud roba. Kralevstve duha ni moguče bez blagostanja. Doma se otkriva smisel biča. Carstve nade je vu ove zemlje. Priroda je istina, ona vu vsake duše druge crte ima. Gda bi se sveta Katarina Sijenska zanesla vu molitve, njezin bi otec videl golubicu nad njenjom glavum. Istina –piše Nietzsche- dohaja z korakem golubice. Lyotard ga razme: - Budime slabi i betežni, kak Proust, budime zbiljam zaljubljeni, pak bume morti čuli golubicu tera seda vu tišine. Strepnje i nade, briga i sreča se nadmeču ud gda je zavladala sotona svetem, bezbožna znanost tera je aždaja. Izaija najavljuje Lucifera: “Kak si z nebesa opal, zvezdo jutra Aurorin sine đavle, seh đavolov”. Brevijar se molil ob devetoj vuri. Čuje se same postojani šepet molitve, vu magme, vu teroj se resplinjavaju vsi cilji. Zrake sveč upadaju na hižne anđele Adama i Evu. Boriju se janec i lav, a same jaganjec pobednik more otpreti knjigu ze sedem pečatov – knjigu budučnosti.

Još se zmislim Joba ja, Joba ja vu sebe, simbola postojanosti vu kušnjah. Pravednika nad pravedniki, teri strpljive pudnaša svoje patnje. Srečne Job živi vu blagostanju, srečni on i žena z žezlem vu ruke. Onda ga stigneju nesreče. On zbeteža. Fkrali su mu blage, sluge vmorili, hižu vužgali. Ar na koncu njegva strpljivost bi nagrajena. Job ozdravlja, a bogatstva mu se vumnože. Gda je Bog nabral dosti motive, teri su odgodili moj povratek vu prah, čakala su me Arma Christi- orudja Kristuševa. Sprave i predmeti terima je on bil mučen, kaj simbolizeraju njegovu muku. A ja, sem sam sebe zadržal vu sveopče patnje. Iskal sem putokaz za slobodnu neodvisnost i vustrajnost, znajuč da me buju predi al kesneše stigli: križ na terem visi kokot, bič, trnova kruna i vrč. Ober njih bu bil Veronikin rubec, kladivec i čavli. Vsakomu človeku treb je zaslužiti da du muke svoje dojde. Patnje i poniženja nam omogučavleju da se prečistime i spozname svoje prave poslanje. Križ križnuga puta savršena je jednostavnost i zapanjujuče siromaštve. Križ je treb prijeti kak nagradu. Na križnumu putu dete Jezuš igra se ze svojemi simbolemi muke.

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.