nedjelja, 23. svibnja 2021.

Kajkavsko najže (5): Šparavec

Piše: Aleksandar Horvat

V desnomu kutu najži, polek obločeca kaj gledi v dvorišče, pod starim ofucanim turskim tepihom, ležala je drvena kištra zbita od starih letvi. Med luknjicama mailm kak glavice od gumbušnice, v kojima su si drevotočci složili stane, su v jednakim razmakima štrčale hrđave glave od čavli, one naregane. Na poklopcu je neko z dletvom narezal slova: BANKA. Na pol hrđava narba je tožno visela, bez lokota. Nasmejal sem se v sebi, na samu misel da v kištri pod nazivom “banka” morti spi kakvo staro bogatstvo. Ali nikaj. Samo prašni kup z rukom spisanih papirov obrubljenih z sitnim mišjim grizima. Od koga je kolko posuđeno, komu treba kaj vrnuti, kakvi su stroški za konje, kakvo je stanje v banki… i dok sem to otkopal i premetal z jene vrpe na drugu, na samomu dnu sem ga zgledal - šparavca.



Kak i saki put dok nekaj takvoga staroga najdem, kak na filmu mi se zblesne, z primisli mi cele slike poskočiju vun na svetlo dana. Denes znam za kasicu-prasicu, samo kasicu ili špar-kasu. Ali dok sam ovoga zgledal zakopanoga pod kupom papirov, činilo mi se da sam z njim isti čas odnekud v glavi otkopal i tu staru reč, šparavec. Imel sem negda točno takvoga, ali moj je bil ljubičasti, a of je nekakvi zelenkasti i ne znam čiji je. Mislim da su šezdesetih let se banke imele takve šparavce za dar, samo je saki bil druge farbe. Meni je šparavca na dar donesla baka i mom je nuter stisnula jenu črlenku, desetaču: “Evo, kaj si nekaj zašparaš dok buš veliki.”

Zmislim se kak je te šparavec bil “železno” zdeni po rukom, (makar denes znam da je bil aluminijski), zmislim se onoga tupastoga zvuka dok bi se ručkica prehitila. Čujem kak je zvonilo dok su se vu njem prehitavali železni penezi. Nosil sem ga po hiži za tu ručkicu prve tri dni, kak kufreka, kajti su vu njem bili “moji penezi”. A zabil sem kak se je šparavec otpiral. Mislim da je na dnu bila nekakva bravica, ali ne bi se kladil. Zmislim se i toga da v šparavcu nisam nigdar nikaj zašparal. Vu tem silnem šparanju sem navek držal onoga “vrapca v ruki”. Do “goluba na grani” niti nigdar ne bi došel. Denes bi onu veliku okroglu pedesetparku hitil nuter, zutra bi ju “zašparanu” zvadil vun i kupil “jenu kuglicu od jagode”, Bazooka žvakaču ili svilene “autek” bombone.

Šparavec kojega sem našel bil je prazen, kak da oče reči da čovek zaprav nigdar nikaj nemre zašparati. Navek se dogodi nekaj neznanoga, nekakva sila, nekakvo “moraš” i “trebaš”, saki zašparani penez dobro dojde, v koji god čas. Če je tomu tak, treba živeti za denes, jer zutra je ne baš sigurno. Prazni šparavci ležiju seposud, po najžima, po kredencima, v starim kaslinima, nikaj vrednoga v njima ne čeka kaj bi nas jenoga dana v došlosti napravilo bogatunima. Penez denes vredi, zutra ne vredi, špara se “bezgotovinski”, a ljudi največ o šparanju govoriju dok nikaj nemaju. A baka je govorila: “ Dete, špara se dok se ima, a ne dok se nema.”

I vezda vidim kak je to jako velika istina. Ve kakti stareši nemam više detinjstvo, pak ga ne bi mogel nikak zašparati. Mogel sem ga šparati dok sem bil mali, detinjstva sem imel na pretek, dvajst četiri vure na dan. I gle, dok premečem v rukama ovu ovalnu, lefku, praznu škatulicu, pozablenoga šparavca, v njemu nikaj preveč ne zvoni jer nema več placa. Pun je do onoga gori zareza, nafilani, natiskani.

Pun veseloga detinjstva.


(A. Horvat, 5/2021.)


Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.