Dan za danom popikavlem se na reč – posledice. Če sem na putu v školu kakvomu dečecu vikala da je selak, skubel me je za lasi i hitil mi torbu v grabu. Ak nis imela zadaču, kopriva po nogicam. Jožek i ja sme tancali kak dve strele skup, vse se prašilo. Male sme se ščipali i posle zabave skrili na dedov štagel, naj bi vidla o čemu je tu reč. I kaj? Trbuh do zubi i pred oltar. Gda sem strgala nogicu, doktor je rekel, če nem ležala, bu posledic. Gdo bi navek briguval o tem posledicam, i poslušal stareše i pametneše od sebe. Ne bi se niš navčili vus put.
Negda, ak je trava bila za kositi, gledelo se v nebe, čitala se Danica. Če se ne potrefi, grde posledice. Mladi muži su išli kositi prede nek se sunčece pokazalo, njih osum do deset, zrušili su travu taj čas. Jaki, pucali su od zdravlja. Kose su fučkale, a travam kosti škripale. Sunce se sijalo na rosnim linijam, a štrki su mam došli po friški fruštik za decu. Gda je seno bilo suvo, rashitano i okrenuto, v linije prizubatano i za doma voziti a oblačilo se susedi su dobežali z vilami i zubačami, saka je ruka vredela zlata, delal se voz. Ili kup ak ni bilo suvo za zvesti na senik. Ko je imel prazna kola i konje doma, dovezel je i nje. Spasila se krma. Živelo se z jočmi širom rasprtemi za ljude okraj sebe (empatija, op. Ifkica). Pomoč se poštivala i bila velika zadužbina. Tulko o temu starinskom i zaostalom živlenju nas selaka. Ni se pripovedalo da je čovek društveno biće. Živelo se povezano (konekted, op. Ifkica) z ljudmi. A to je zdravo živlenje. Mi mladi gledeli sme se prek motike, srpa, zubač, vuz dreš ili na berbe; pri meši, na pijacu, na zabavi. Bili sme zdravi, prirodno lepi, crlena ličeka od friškoga zraka i posla. I nigdo ni bil sam.
A denes, majke ti mile, gda se dekla gre pokazati med ljude, obuje štikla-šuze, pak je nestabilna i ode zdrava kičma k vragu! Šuze žulaju ko nevola i rearanžeraju joj prste da se opče nesme zuti, kak je to grdo za videti. Zato mora i v postel v štiklami. Ak joj partner mora gledeti prste na noge narivane jen prek drugoga kak vrhi Mont Everesta bez snega z prst debelim venami na ristu, niš od seksa ni udaje. Onda, oprava menše pokrije, neg otkrije. Ili, obleče lače kaj joj beže v rit, več kak ju uputi trendseterica, modna kolumnistica i/ili blogerica (kojekakve niškoristi, lenčine, op. Ifkica). Jer same ona ima rit i nigdo više. Lice, to mora ožbukati i pogletati. Zdepilira kaj joj je od vlastite pameti ostalo, pazi s kim dojde na gmajne-party i mam na mobitelu gledi kaj o nejnom looku i appearanceu vele mreže. Navodno društvene. Gdje je svak sam i svoje slikice meče kak na oltar javnih i tajnih službi. Na tem kak vele party, zeme kupicu nekakve pijače (koktel, oh!, op.Ifkica) i mota se okolo. Kaže nove, bele ko sneg i skupe ko vrag zube. Mota se sim-tam. Za vse to treba financijera. A lov je navek slatki. Pri švedski kopanji same gledi ranu, nesme preživati, bi zube zmazala. Blogerica joj je napisala da grdo zgledi gda jê, a to ni dobro. I, negdo bi ju mogel nekaj pitati, nemre pripovedati z punim požerakom. Šavi na kikli ili lačam bi mogli spucati če se naje, osim ak to ni planerani i dobro zvežbani performans za YouTube. A noge bolijuuuuu! Celo se vreme drži za čašu, i mora paziti kaj joj negdo ne bi hitil nekaj v pijaču, ak je veruvati serijam i filmom na televiziji. Mogli bi ju razbojniki odvleči v svoju gajbu i, gdo zna kaj dale. Če ostane živa i vjutro dojde domom, je na konju. A mlade žene su budučnost sveta, znesu nove generacije. One su svetinja! Pak, kaj društvo dela žnjih?
Negda su se ljudi družili vuz posle, nisi ni primetil da je žmefke. Znojil si se i nesi nikomu smrdel. Teretana je bila na polu, na seniku, na drešu, na tavanu z vrečm šenice i kuruze, a če su muži šteli prave mišiće od kojih su pucali rukavi na košule, nametali su 10-15 vozi gnoja. Če se išlo kuruzu okapati, primera radi, gazdarice su v rano jutro, z veseljem, doma priredile fruštik i mam skuvale obed, ostavile ga na tabli ili v rolu naj bu topli. Podojile su krave i pustile je na pašu. Čuvalo ih je dete koje još ni išlo v školu. Pobral je mlajšega braceka ili sestricu i na nje pazil, ak pri hiži ni bilo babice. Deca su bila odgovorna od mala. Ak su vsa deca bila v škole, dedeki su pazili na blago. Tak su bili od koristi i nisu bili mlajšem na putu. Ni bilo domov (hospice, op.Ifkica) za stare i betežne. Ostalo se ze svojima. Muži su do zajnoga zijali na vse v hiži i držali pulitiku da je najstareši – najpametneši. I svekrve su znale imeti sekiru mesto jezika. I to tupu, za snehicu piliti, cepati, tesati, mlatiti dok je mogla pripovedati. A, če im to ni prešlo, trpeli su i čkomeli. Mreti se mora, za sto let ni kosti ni mesa. I na selu se navek znalo, vse prejde. (Pantha Rhei, za one kaj se delaju školani i pametni, op. I.). Mleko za konte se nalejalo v kantice, mušterije su si je same zimale z krušne peći, mam pri lesi. Gda komu paše. Kaj je doma ostalo za sireke i puter, nalejalo se v čupe i odneslo v špajzu naj se skiseli. Po zime su se čupeki držali na banjku, na toplom. Opralo se mertučje, pomela hiža i beš na pole. Gda su se gazdarice vrnule s pola imele su skuvano, a to je bil veliki plus. Bi denes rekli da je to multitasking, kaj ne?
Okapalo se, pak je to kretanje na friškom zraku bilo zdravo, a sunčeko je dalo besplatni vitamin D. Zemlicu se ni trovalo kak denes. Zelo se jelo na pole i vodica ze zdenca, pak se počinulo v ladu. Žene su bile frčne i mršave, dobro zvežbane, smele su se do sita najesti domače i zdrave rane kaj su same uzgajale, skuvale i spravile za zimu. Tak jake i zdrave, dečicu su rađale z veseljem. Muži su bili jaki kaj biki, itekak plodni! Ni gazda smel svoju babicu pogledeti, mam je bila trudna! A, imam za čitati da je same trist osem posto spermičev denešnjih mužev plodno u odnosu na njihove dede pred pedeset let. A još vuz to su spori i leni kak im i gazde. To je zato kaj niš ne delaju, ne jeju zdravu ranu, zrak ni čist, voda ni kaj je negda bila. Tak vele znanstveniki, ne bi se štela mešati. Neču se več sekirati zotem kaj nemrem premeniti. To ne dobre za tlak, veliju doktori.
Negda se išlo v šumu i zvažalo drevo, naj bi hižica bila celu zimu topla. Ak sfali, lako se zruši koji jablan ili agacija na polu. A ak je zima dugačka i krvoločna, a svinjci slabi i stari, onda se panje raskala i zakuri v svinjskim odajama, naj bi bilo toplo. V velikoj zimi slabo napreduju. Gde god je bilo mesta, sadilo se drevo i voćka. Nekomu bu, negda, dobro došlo. Sunčeka ima dosti za vse. Bilo je cajta za posaditi voćku, ni bilo interneta, televizije ni struje. Ni deca se nesu stigla igrati, a kam stari. Navek se nekaj delalo i skrbelo. I z drugima delilo dobro i zlo.
A, da je bilo nepravde, bilo je. Čini se menje nek danes. Vu tom zaostalom svetu ljudi su imeli savest i odgoj. Dobro, skoro svi. Denes stan, auto, kompjuteri, putovanja, more, skijanje i, nezadovolni! Puni stresa. A to ni dobre za zdravlje. Če je sused išel jašiti slone v Indoneziju, drugi ide v lov na krokodile v Afriku. Naj bi se pokazal ko pametneši, bolši, bogateši, bedasteši i ko zna kaj još. To je onda te kak vele natjecateljski duh. Bokci, ne znaju da preveč toga duha ni dobre za nje, sami su svoja nesreča. Ti kak vele konzumerizem i materijalizem im je pantleke v mozgu na trde vuzle zvuzlal. Za neveruvati!
Dok moj Jožek i ja moremo noge vleči po našemu gruntu, za nas, našu decu i vnučeke bu domačega mleka, sireka, putra i ono kaj naša Goga i Martina, vnučice najvole, stepke. Kakva bi ja babica bila gda im to ne bi dala? Jena kravica kak ni jena, pak imamo dve. Nisu usamlene ni anksiozne v štali, a morti se i pospominaju gda su same. Gdo zna kaj se događa za zaprtemi štalskim vratima? Jožek se voli z traktorum špinčiti po polu. Zjorje, poseje, pokosi, a ima i kaj šarafiti gda ni posla na gruntu ili je pri hiži tiha meša.
Ni Jožek nemre biti stalno doma, mora prejiti med ljude. To je zdravo i normalno ponašanje, socijalizeranje, vele psihologi. Oni znaju kaj pripovedaju, posel im je bez vil i motike zubatati, okretati i prekapati po moždanim pantlekima pri ljudi i njihovim izražavanjem u ponašanju. Ljudi su društvena biča, veliju ti vučenjaki (vučeni i jaki, op. Ifkica). Ljudi su kak, rečimo vuki. Moraju se držati skup, v čoporu. Pak su zmislili partije i stranke, kaj bi bili bliže kopanji. A to nema veze z imunitetom čopora ili krda, gda su u pitanju zarazne betege. Same po pitanju društvenoga statusa i moči. Pred bogom i virusima sme vsi jednaki.
Ali, moj gazda nemre nekam otiti, a da domom niš ne donese. Ne krade, on kupuje kaj treba i ne treba. To je onda te eskalirani potrošački mentalitet. V genima nam je još od staroga kamenoga doba. Vse kaj najdemo, nosimo domom. Dvadeset i pet jezera let sme birašili biljke i lovili životinje, vlekli domom v špilju k svojem, zabadav i bez PDV-a. Tak sme nasledilii umnjake i slepo crevo, a jezera let nam ih ni treba. Pak je moramo aperirati ak delaju probleme. A če se ideš z evolucijum bosti, dobiš rog v to slepo crevo. Nekaj se more, a nekaj se nemre premeniti. Če se tega držiš, ostaneš kolko-tolko zdrav. V glavi i v telu. Jer čovek, ko i riba, od glave smrdi.
Jožek, mesto da bere divju šenicu i ze strelom i lukom lovi mamuta, na akcije v dučane vreba emajlirane ranjgle i vandle. Bu treba za čvariti mast i kobase delati. Kaj da doma niš nemamo i bu nas još sto let na svetu. Beda z detinjstva leči se celo živlenje. Kak zgledi, bu treba prizidati još jenu špajzu za vse to mertučje, mam vuz letnu kujnu, a bome i preširiti radionu do kraja štale, za halate kaj kupuje i prinaša domom, da ja ne vidim. Mislim si, naj se veseli i naj z pajdaši zida i ima radne akcije. Naredim im jelo, malo si gemišteka spiju pak budu veseli. Ampak su i dvorce i cirkve prizidavali, kako i onu veliku cirkvu v Barceloni*. Nigda kraja zidanju.
Prekčera je kupil crnu, tešku, emajleranu od dvadeset litri, ni ranjgla ni lonec. „Za sarmu! Baba, ranjgla za sarmu!“, vikal je još z dvorišča i z auta dobežal z posudom v kujnu. Ja sem baš palačinke pekla. Onak z ranjglom v rukami, zgledel je dvajst let mlajši. Veli: „Babica, to ti je moj dar za rojsni dan.“ Ranjglu kaj nam ni treba je podmetnul pod darek. A rođendan mi je za šest meseci! Slično kak ja racina jajca podmetnem pod kvočku! „Tu buš kuvala sarmu gda deca dojdu: red zelja, red suhih rebric, onda, trideset sarmi. Red špeka i češnjovki i drugi red sarme. I tri listeka lorbera!“ Mam se počel oblizavati! To se onda zove sreča! Takov je. Če očeš ostati pri pameti i zdrav, ljude ni treba i nemre se premeniti.
Gda deca dojdu domom, za naše rođendane, Uskrs i Božić, to je celi narod. Gda sme skup za našim stolom, ja od sreče dobim krila. Svevišnjemu se od srca zafalimo. Zdravi sme, dobri sme si, poštujemo se. Če delamo i mučimo se, imamo kaj jesti i za račune platiti. I je Mir. Istina, od posla i kuvanja bole krila i nogice, ampak snehe, čeri i nuke pomoreju, nis sama. Bilo je žmefke, bilo je sekak, a to naše bogatstvo se nemre nigda i z ničim meriti. Mi nesmo nikomu niš zeli, nek drugima davali kak sme mogli i znali. Delili sme z ljudima dobro i zlo. S kem se dalo. I naše je veselje zdravo kaj dren!
Rječnik:
skupsti – čupati za kosu
banjek – povišeni dio velike zidane peći u kuhinji, iznad pećnice
kečke – pletenice (kose)
tancati – plesati
ščipati – štipati
trbuh do zuba – trudna
speglati – izglačati
štrk – roda
nazubatati – prikupiti grabljanjem
namrčiti (o nebu) – smrknuti se pred oluju
krma – hrana za marvu
zadužbina – djelo za dušu darovatelja
briguvati – voditi brigu
špinčiti – hvalisati se
zubače – grablje
niškoristi – beskorisna osoba
gletati – navući glazuru na neravnu površinu
švedska kopanja – švedski stol
zijati – vikati
sekirati - brinuti
težak – nadničar
skrbeti – privrijediti
cvrljiti – ispeći
žmefke – teško
Lektorirala Ivana Cerisnki, prof.
Objavljeno u Zborniku 12. SUSRET HRVATSKOGA DUHOVNOGA KNJIŽEVNOGA STVARALAŠTVA „STJEPAN KRANJČIĆ“ 2020.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.