nedjelja, 12. srpnja 2020.

Božica Jelušić | Sabljice



Sabljice su zrasle vrčaku pod plotom
Na žarkem se suncu prelevaju farbe.
One joko plene z kraljevskom lepotom,
Gdi raslinje se je kak hrđave švarbe.
Najde se dišavja, ima grmek kuštrav,
Tam gdi one rastu, krepdešinske frajle.
A gdo ih podiši, ide svetom zmuštran,
Po rosi vu vrčak hodi na sabajle.
Se mu drugo nekak v običnost potone,
Se je kak v štacunu ili na proščenju.
A od čistog Svetla zetkane su one:
Samo takvo cvetje hlepi k zveličenju.
To tak ima biti, bar jemput na leto,
Gda sabljice cvetu, da se čuvstvo zbrusi:
Da se čovek zmisli kak je lepo sveto,
I kak z Božje ruke lepota se strusi.


Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.