nedjelja, 7. lipnja 2020.

Željko Bilankov | Jana i ja


(tridesetdruga kratka priča pisana pretežno šoltanskim dijalektom)

Jedva san dočeka jutarnje svitlo, koje se stidljivo uvuklo kroz ponistru moje sobice. Kako zaspat, kad mi je u misliman Jana! Nikad nisan bi čovik od puno sna, ma ovi se put, smišna plava čehinja uselila u moje srce i ni mi dala mira cilu noć. Po svoj prilici bit će još jedan lipi litnji dan, a ča mi to vridi, ako je neću moć vidit. Jučer san iša kaićen kod tete i koju onda skužu smislit, da jopet oden tamo. Mijun kombinacij vrtin u glavi, ali mi ništa pametno ne pada na pamet, pa pomislih da mi je najboje spustit se poslin do mula i razbistrit možjane u netaknutoj modrini još pospanog mora.

Ma, ni prošlo deboto po ure od mog ranijeg kupanja, no obično, kad mi se učini da iz pravca Bada gre motorin, baš prima nan. Je, jeee, govorin u sebi, dok san skaka na noge, ovo je barba Mikula, a u njegovon brodu jema još svita. Brž i zato ča je to bila moja žeja, brž me je zajubjeno srce upozorilo, ali ja san osića, da ću ugledat Janu, meju svin tin judiman. Ča su se sve više približavali mulu, meni je osmih bi sve veći, pogotovo kad su nan se susrele oči. Naravski da san pomoga i njeziniman da stanu na mul, ali njoj, s posebnon pažnjon. Dok je barba armižava brod, oni su meju sebon ništo pripovidali, a Jana se sagnula da uvati bokunić mora i umije lice, uz pogled koji me razoruža. „Di ti je otac Žele, 'ajde, javi mu se da dojde doli, doni san van ribe, tek izvađene iz vrše i teću prstac!“, reka mi je. „Neka ti se spusti i mater, da upozna ove naše Čehe, a ionako su se tili malo provozat brodon po vali!“. Brže san se vrati s mojiman nego ča san odjuri po njih. Jopet sporazumivanje, malo na mote, malo ričiman, ma je susret bi višje nego srdačan, vidilo se to po liciman mame i tate. Nije in se dalo ić gori na kafu, kako su moji pridlagali, jerbo nisu tili smetat, a želili su, da in barba Mikula pokaže bar dil lipote našega Rogača, kad su već tu. Otac se odma uvatit čistit ribu ispod mula, a oni su ga pažjivo promatrali i ništo komentirali, pa smo na tren ostali sami. Parilo mi se, kako nima nikoga oko nas. Kako već to biva, istovrimeno smo ništo izustili i stali,..onda jopet isto, pa smo prasnuli u smih. Bila je prekrasna u tom času, sa plavim očima, rumenin usnan i smišnom rupicom na bradi. Inšoma, skupi san snagu i pomalo nespretno predloži nadajući se da će me razumit, bi li sutra išla s menon kaićen, pa bi mogli pričat i brž se zajedno kupat. Potvrdno je klimnula glavon, ča me učinilo najsritnijin čovikon na svitu i okolici, jerbo mi je bilo teško virovat da će pristat na to. Odma san predloži i pokaza misto priko puta vale, di bi mogla doć na noge, ako 'oće, pa bi je skupi oko ove ure. Barba se taman sprema za nazad, a njezini je požurivali, dok su se pozdravjali sa mojiman. Nekako sam joj uspi taknut ruku, da joj još jednon vidin potvrdu u očiman, na ča se Jana samo zagonetno nasmišila. Mahali smo in na odlasku, a meni se činilo, kako su nas svi ubrali u trenu. Ništa mi odjednon ni bilo važno ni teško. Da je sad otac reka, kako moran prinit tonu savure, salbuna oliti cimenta, jerbo se uvik ništo kod nas radilo oko kuće, radi bi punon forcon. Ko će dočekat sutra, ure sporo prolaze, a u ono vrime ni bilo mobiteli, da se barenko čujemo.

Već san navečer najavi sutrašnju vožnju i kako ću se nać s prijatejen, pa ćemo ić u Bočac, oli Kašijun, malo se smočit. Inšoma, doša je i ti dan, pa san nestrpjivin zaveslajima krenu u neizvisnost. Bi san blizu plaže Elektroprenosa prin vrimena, gledan u pravcu Bada, a nje nigdi na vidiku, ali kako nisan zna da je već išla valon, koju sa tega mista nisan moga vidit u cilosti, pomalo san se rastuži. Jana se odjednom stvorila iza mene, a kad me zazvala po imenu, rastirala je učas moje loše misli, a tugu je sminila srića, pa smo se uskoro otisnuli od kraja. Ona sidi na krmi, ja nasrid kaića i veslan, ona s kapicon na glavi, obara pogled, dok je infišo gledan, stišče šugaman među kolinima, i prste u šlapican na nogan. Inšoma, povata san i razumi nike njene riči, kako in je rekla da će malo sama šetat i usput se okupat. Zato smo odma krenuli na suprotnu stranu, prima, u ono vime najpoznatijoj plaži Pluzavici, di se desetak godin poslin snimalo legendarno„Velo misto“ i popularnon, među nan iz sela, „Don Dujinon žalu“, pa put Kašijuna. Divila se teplon bistron moru, suncu, boroviman, tamarisiman i ostalim krasotan našega Rogača, dok san vesla put vale sa velin bilin žalon. Povremeno bi veselo pričali o svemu ča nan je padalo na pamet,..više se razumili nego ne, ali san i daje zajubjeno zuri u nju. Koliko san s'vati u jednon momentu mi je kazala da me ne more gledat u oči, ka ja nju, jer joj se pari kako će se utopit u njiman, pa se stidljivo nasmišila. Pitala me i to, zašto me ne zanimaju domaće cure, valjda se plašeći neizvisnosti moguće jubavne veze, izmeju nas dvoje. Nisan osića umor veslajući, a uvala Kašijun, bila je sve bliža. Hlihliščali smo se, Jana se okrićala, grabila rukan more i štrapala me š njin, pa san na njezinon licu iščitava pravu sriću, a kako je tek lupalo moje srce. Nikoga u vali, bonaca ka uje, dok cvrčci pivaju svoj omiljeni poj,..još par zaveslaja i kaić će se nasukat na žalo. Sami konačno, ona i ja, daleko od svih, daleko, ali tako blizu jedno drugome!...

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.