Željko Bilankov | Daž u noći ditinjstva moga

(1 priča pisana pretežno šoltanskim dijalektom)

Kišna noć u Grohotan tih teških, a jopet lipih 60-tih. Po starin skalan i glatkin kamenin pločan naše balature jako štrapa neumorni daž. Svitlo isprid vrat od kujne obasjava noć, a mi se unutra stisli.., vanka je zazimilo, ne čuje se ni pasa. Stari špaher troši preostale bije i svaki put kad se njegova vratašca otvore, čestice žerave pospu nas poput krijesnica. Tu smo,..dida, baka, teta i ja,..ja, mali Žele, kojen se ne ide u Split, pa san se ispruži uzduž drvenoga banka. Mamin otac, moj dido,..tako san u ditinjstvu zva dida Tonka, zeza me, kako ni od banka nisan veći i ća ću u ti veliki grad, kad mi je vode boje.

Reka' san onu legendarnu, na koju su me često podsićali kasnije: "Kvragu i Split!", pa su svi pukli od smiha. Pari mi se da i sad vidin tu sliku i baku Tonku, posebno nasmijanu, sa onih par zubića koje je imala. Mi u polumraku, teplo nan je od zadnjih plamsaja vatre, ali triba ić' leć. Iz kujne do vrat kuće, di su sobe, moramo proć' bar dva metra, pa me bilo strah, da ne pokisnen i da se kojin slučajen ne poskliznen priko balature. Baka i dida su već prošli ti malešni, a tako važni dil puta. Posljednji titraji ognja,..teta Ćirila me zagrlila, pokrila s nikon robon i povela u kuću. E, sad se triba popet uza drvene skale na gornji pod, di san jedva čeka da ležen u sridu, između dide i bake..,a teta se vratila u kujnu, zapalila jedan španjulet za gušt, sama, sa svojin mislima pred san, sa mislima na svoju jubav, na onega, kojeg nikad ni prestala volit. Ne znan koliko je još ostala u mraku kujne dok je vanka žmirkalo svitlo pod upornin kapljican daža, ali znan kako su se, te 'ladne kišne noći u mojen selu, njezine misli stopile sa suzan neba!