Đirajen ja rivon i trevin nju. Sidi na šentadi. Brže-boje se dolibin i bacin joko na nju. Čirin. Kaka je? Ča je lipa Gospe moja. O ne... ne...ni mi triba karnoćal oliti dvogled.To se zove jubav na prvi pogled. Opće ni neobično jedno poznanstvo obično da se ni zbilo čudo. I evo ča se dogodilo. Zajubija san se ludo. Ništa nisan mislija kola san oko šentade, pripeta joj se s bande i drito kraj nje sija. Buljin ka ča maška bulji u miša. Ili san ja miš, a ona maška. Ni važno. Nima veze ja buljin.
A ćutin se, kako? Evo kako. Već pinkicu ćutim leptiriće. Ajmeeeee, ni mi dobro! Ka da me neko lupija. Ajme meni, afanat će me na samome mistu. Zajubija san se.
A onda? Onda se u tilu sve uskomeša. Ne znan kako daje? Aaaaaaaa...triba bi je badnit oli joj čakod reč, koju smišnu besidu, ma me straj mogla bi se namusit i uteč. Boje da mučin. Leptirići se komešaju u štumiku. Eeee... da su samo leptirići. Ćutin zološki vrtal cili ča mi u trbuju cvili. Crvenilo blišći na licu, želudac se uskomeša, srce skače oće izletit vanka. Oči se raskolačile. Odma znan ča je to.To su nuspojave zajubjenosti. Aaaaaaaaa...bidan ja!
A sad gre ono najgore. Cili san se opotija, uši se užarile.Ne možen se snać. Ona sidi i muči ka zalivena. Mučin i ja. Asti Gospe, nisan izustija ni a ni be. Bidan san zamuka. Ne znan di ću s rukan. Nemir koji ćutidu zajubjeni ni uvik sladak. Znade bit i te kako gorak. Ajmeeeeee! To upravo ćutin na svojoj koži.
Ne obadaje me. Čini fintu da me ne vidi. Gospe moja a da ni betežna, mutava? Boje i to vengo da je lajona da brontulaje. Činin kuco i ne pačan se u nju. More bit da ona konta da san i ja mutav. Ajme meni u ča san se uvalija. Ja se zajubija, ona pari mumija. Uzdišen i izdišen. Zemjo otvori se. Parin ka golub na izdisaju. Poću ča - pomislin, pa se pridomislin.
Sidin ja sidi ona. Niko se u nikoga ne pača. Mučimo i ufamo se u Boga. Niko mora progovorit. Oli ja oli ona. Onda izjusti ona - Šjor jeste li vi iz ovega ovod staračkoga doma? Jušto san vaporon arivala, ja san nova.
Nisan joj ništa odgovorija justa san u ravnu crtu zatvorija.Tresa san glavon cili san smantan bija. Nisan jema ča reć tija san uteć. Poslin san se diga i nisan moga odit. Deboto san pa. Izdale su me noge. Onda me ona vazela za ruku i partili smo ka momak i cura.
- Sva san nika išempjana, kada san išla na kvasinu! - izleti joj iz just na brzinu.
- A meni se čini kada mi u ćiverici ni sve čisto - reka san bistro - pari mi kada gren na ditinstvo.
- Ma ni nan ništa, samo nan je naudila južina.
- Bome jemaš prav i ja san to mislija, kvragu i južina.
Šesno me pogledala, jušto kad je klapa zakantala: - Noćas mi se snilo moja bajna vilo, da je tvoje tilo kraj mojega bilo...
Gušta san. Ajme ča nan je lipo bilo, sve se lipo potrefilo. Opa –cupa,opa-cupa sad ona i ja đirajemo skupa.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.