Predek neg prejdem nekšni posel obaviti z administracijo – navek me vlovi splašenost od dogočasnega čakanja i skešenih gospoja nalafranih vusnic i špičastih črlenih noftof - štere bodo v čudu zokretale z očmi jerbo pak nijesem pribavila se papere za tef „predmet“.
Nigdar se jošte ni pripetile da dojdeš na opčino, vu banku, vu bolnico, na šalterje raznih vrst i fela - a da tev čas obaviš kaj trebaš i lepo i lubezno se pospominaš ž gospami na šalteru - o tegobnemu problemu šterega več čudaj noč vrtiš vu glave.
Takef scenarij neš videl doklem god sramežlivo čkomiš!
Naveke te gospe nekaj cepidlače, spotikavleju, frkčejo i zdihavlejo: „Ali, znate, nedostaje vam ključni obrazac; nije vam kompletna papirologija; kuda ste navalili – pričekajte vani, ja nisam nadležna za taj vaš problemčić, ne znam tko vas je uopće uputio k meni?, ccc, zaboga!; ne ide to tako kako ste si vi zamislili, gospođo, draga; eh! vi uvijek pogriješite kat i sobu; ne vidim što uopće želite; niste se jasno izrazili u zahtjevu; morate podnijeti prijedlog/podnesak/zahtjevnicu/zamolbu…, pa, ovaj, to se uopće ne može podvući ni pod jedan članak koji je meni na raspolaganju; drugi put dođite pripremljeniji; obratite se kod moje kolegice u sobu XX – ah!, da, ona je sad na godišnjem a duga je na gablecu… baš ste potrefili vrijeme kad su kolege na terenu…“ i tak dale, i tak bliže…
Mam me zaboli želodec ščim vidim da me gledijo onak čez spuščene nacifrane naočari, somnjivo me odmeravaju nekak poprečki kak da sem opala z naiži il kak da sem pozabila mozek na paši; a one su tak pametne i fletne i gizdave da im same kvarim so svojemi štentanjimi celi božji den.
Najpre se zaznojim, potem se resrdim, a poklem tega zgovorim ne baš lepe reči koje mam i zažalim ter sem ih zgovorila v moke i bojezni da pak nem zgotovela posel.
„Aaaa, ne, ne… to ne same tak prešlo“ – gruntam vu sebi. „Naj znaju da z Zagorkom posla imeti – ni baš lefko!“
Sa drfčeča i nabrušena kak kosa skešeno im skrešem: „Bom vam ondak poiskala šefa pak bo on mesto vas posel rešil!?“
Mam se zlecneju i spremeniju; srdito me spoglediju kak strele nebeske - al senak zmekšajo - bomo rekli - „konverzacijo“: „No, pa nemojte, gospođo! Pa, naći će se neko rješenje na obostrano zadovoljstvo; ima on, znate, važnijeg posla – nećemo ga ometati, eto, baš sad mu je došlo izaslanstvo z Bregof pa je u jeku domjenak… pa nećemo valja dopustiti da im se odojak ohladi, zar ne? he-he“.
Ondak ja kakti popustim a one tef čas obletijo z paperi tri-četiri interjera - i mam je se spotpisano i spoštambiljano.
Si mislim: „Aha, ve najempot se štima kakti vurica?!“
Baš sigde i saki den se čovek zarad nečeg nasekira.
Ak se male ne skričiš i poštenski ne zboriš za svoje mesto pod šalterskim soncem – boš čakal i čakal i čakal – i neš nigdar i nikaj dočakal!
Sem ve odehnula.
Da nesem male „podmazala situvaciju“, tak žmefko bi se još jenu noč vrtela vu posteli i zjutraj drftala vu opčini, v kak kača, dogačkomu redu; i spotiha molila Bogeka da nalafrane gospocke šalteruše rešiju moj, tobož „nerešivi“ problem!
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.