Kolumne

Jelena Hrvoj
Patnje mladog autora

Ela Ernoić
Rozin kutak

Mirjana Mrkela
Ispovijed jedne čitateljice

Jelena Miškić
Pramcem u sumrak

Martina Sviben
Sve je to u glavi

Aleksandar Horvat
Kajkavsko najže

petak, 17. prosinca 2021.

Željko Bilankov | Sve je dobro, ča se dobro svrši


(kratka priča pisana šoltanskin dijalekton)


Ko zna o čemen san sve misli kad se ugasilo velo svitlo u mojoj bolesniškoj sobi. Te duge noći prin dizanja punti sa droba, naravski da nisan moga pošteno ni zaspat. Jubomoran ča su mnogi već dronjali i hrkali sve u šesnajst, vrti san se u posteji ka žejud i pokuša mislit na ništo lipo. Razumi se, na velu pobidu „Ajduka“ kontra jutih protivnikov iz Zagreba, a posebno, na moju smišnu kolegicu iz razreda, koja mi je svojon neočekivanon vižiton ulipšala ovu nediju. Mejuto, deboto mi se parilo da osićan kako mi raškaju po stumiku, a ja škričen od muke, jerbo me stvarno puno bolila rana. Toliko je strah bi jači od svega drugega, da san brž zaspa tek prid jutro. 


Doručak nisan ni taka, tek srknu malo čaja, pa mi je medicinska sestra, vidivši me tak'og, pokušala svojin teplin osmihon dat koraja, ka i drugi iz sobe.


Nisan se ni ošrva, a već smo se našli u privijalištu di je triba doć likar. Iz kolici dospi san učas na posteju, a oko mene pusti medicinski inštrumenti i likarije. Malo potla eto ti doktora, cilog u priši. „Di je mali Bilankov?“, upita i zaviri iza paravana, očito spreman na šalu. „Je li te još uvik puno boli dropčić? ☺ Ajde, ajde, budi muško, još malo i greš doma!“, reka mi je i nikako uli povirenje. Inšoma, dok san se tresa ka šiba, već je skinu prvi punat. I onda, na vidno iznenađenje njega i sestre, iz tega mista izaša je pravi pravcati gnjoj. Primiti san da su deboto šokirani, jerbo je nastavi izlazit i tek na lagašni pritisak rukon,,pa sve  do samega kraja postupka. Sićan se dobro kako su zamukli, uozbiljili se i uzvrtili, a jedna cila njiova posuda bila je puna te grube tekućine. Meni je pače, bilo najvažnije da me višje ne boli stumik, ne s'vaćajuć u kolikoj san opasnosti bi da ne dobijen otrovanje krvi. Rana je očišćena, stavjen dren i propisan niki antibiotik, pa smo svi mogli odahnut. 


Mejuto, otac se ni moga smirit ni pored nastojanja mame i ti se obračunat s likaron, pa čak i tužit bolnicu. Zapravo, ispostavilo se da tak'u vrst punat ne prihvaća moje tilo, nego reagira na ovi način. Ma, potla su me držali ka malo vode na dlanu i bilo in je puno žaj, ča jednemu momčiću nisu virovali. Čin san moga ustat, pa makar se rana ispo flastera ni zatvorila, ali me višje ni bolilo, oprosti san sviman i ponosno šeta hodnikon, ka car…hahahhaa Da se to ni dogodilo, već bi se oporavja doma, ovako, produži san još par dan. 


I kako to sudbina namisti, ja osta, a u bolnicu doša moj idol, legenda „Bilih“, Pere Nadoveza. Brž je tako moralo bit da ga sritnen u hodniku, za vrime mojeg radoznalog điravanja od sobe do sobe. Prvo san ga ugleda u daljini, pa se upita je li dobro vidin, je li moguće, pa razgorači oči i otvori justa, a onda se on, zavezane glave i u bolniškoj pidžami, stvori isprid mene. Ni danas ne znan otkud mi koraja da mu se obratin, ka da se zapravo znamo: „Dobar dan, ča ste vi došli vode!“, našto je odgovori ka iz puške: „Ma, igrali smo prijatejsku utakmicu u Solinu, pa me lupi oni divji Babelli!“ Nasmija me i odma je nestalo i ono mrvicu treme, pa san mu poželi da ča prin ozdravi i nastavi zabijat gole. „Znajte da „Ajduk“ nosimo u srcu i svi čekamo tu titulu prvaka Juge, nakon šesnaest godin posta!“ Obeća je i te iste godine san se ostvari, a ja iman brž bokunić zasluge ča se motivacije tiče, bar mogu virovat u to.


Inšoma, uskoro san izaša iz bolnice da se oporavjan doma, uz dirljivi oproštaj sa doti jednin iz moje sobe i poneku suzu radosnicu. Zahvaljujuć znanju i upornosti doktorice Vulić, našoj susidi u zgradi i maminoj prijatejici, koja je vodila brigu o meni, rez je postepeno zaresta. Zapravo, napravila je čudo, jerbo niko ni virova da se rana more zatvorit bez lagjeg operativnog zahvata. Ma, triba san potla, kako je ona predlagala, napravit plastičnu operaciju da se ne vidi udubina na drobu, ali nisan prista na to. Pa ča, jemat ću dva pupka, govori san i puca od smiha! ☺ Nego, bit doma ča višje, u stvari mi je potpuno odgovaralo. Nisan mora u skulu, a križaljke su vapile da ih sastavjan…hahahhaa. Vrimena, strpjenja i voje nikad mi ni falilo, a znanje san stica, pa je moja suradnja prima tadašnjin enigmatskin listoviman, doživila pravi boom. 


Te iste, ijadu devetsto sedandeset i prve, objavi san i prvu križaljku! Koja srića i ponos. Nezaboravno! Navečer bi zadovojan poša leć, znajuć da još niko vrime neću meju klupe i pazeć da ga ne probudin, pojubi malega brata koji je već spava tik do mene. Do uzglavja kauča na kojen san leža, upali bi malešnu sviću i prin sna obavezno čita ništo, obišno Branka Ćopića, koji je obilježi moje ditinjstvo i rano odrastanje. Još i danas, kad se sitin njegovih „Orlov koji rano lete“, „Slavnega vojevanja“, „Magarećih godin“ idr., smišak mi zaokruži lice i vrati u tu dragu sobicu, našega stana u AVNOJ-evoj br. 22.


Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.