Želimir Bilankov | Materina jubav zauvik

(četrdesetpeta kratka priča pisana pretežno šoltanskim dijalektom) 

Koliko god mi je na poslu bilo stresno, puno višje san se radova ča me mater čeka s obidon i osmihon koji liči sve rane. Bi je to jedan od onih dan u svakoj šetemani posvećen istinskoj radosti naših susreti. Nemojte mislit da me ni ka i uvik zvala u Banku kad ću doć i kako će se oladit spiza, a ja slično ocu nisan voli znat ča je spremila. Mejuto, dok san sredi stol, ugasi kompjuter i u priši mimo kolega izleti iz kancelarije, već su dobro prošle četiri ure. Srića da su moji živili na samo deset minuti laganog hoda od mojega posla pa se nisan stiga ni ošrvat, a deboto mi je već kuća bila na vidiku. Lipo prolitnje sunčano popodne, di koji tonobil i poneki šetač bili su moji suputnici.

Zapravo, ulica na uzbrdici s jedne i druge strane nadsvođena zelenin cabliman, pružala je posebni popodnevni čar. Naravski da san svrati u dućan, jerbo osin drugega nikad ni smilo falit kruva. Pamtin niko drugo vrime, kad ga ni bilo moguće kupit svugdi. Jednon me otac posla u gostionu blizu nas, pa me gazda gleda u čudu da tražin samo kruv, a bome je košta skoro ka manja porcija ića. Inšoma, dok san zvoni na vratiman, čujen mater iznutra: „Žele, otvoreno ti je, ulizi, 'ajde!“ Zagrljaj i pojubac obavezni uz osmih i tiho upozorenje da otac kunja u tinelu, po običaju, u fotelji. Ćirnem da ga ne probudin, njemu „Slobodna“ na koliniman, joči zatvorene, justa poluotvorena, a na tv-u šuška legendarna serija, „Zauvijek susjedi“. Koji neorealistični prizor, hahhahaa. Dok je mama postavjala stol, ja san na putu do banja iznova sinja urednost i čistoću stana i po ko zna koji put se oduševi njenon životnon energijon. Ma, neka je ona bila ovdašnja poznata šnajderica sa istančanin osićajen za lipo, ipak za ženu od skoro osandeset godin, takvo održavanje kuće zahtiva izuzetnu snagu tila i duha. Prenula ma sa uvik istin brižnin pitanjen,: „A jesi li se javi doma Jerkici, da te ne bi čekala?!“, iako je znala potvrdni odgovor.

I eto me u kujni, a sve na stolu po mojemu guštu. Blitva, angriz koji obožavan, parmezan, kozice na buzaru i desert iznenađenja. Ma, ko to more, jedna je majka. Sela je meni nasuprot i nutkala me po običaju, pače pitala je li mi se sviđa spiza, radosna i dobra poput brižne tice koja svojin mladiman nosi hranu u gnjizdo. Tako je to, za nju san uvik bi mali, bez obzira na poprilične godine koje san uvati u prkno. Razgovori ugodni uz jiće, njena briga za svih i životni saviti, ispunjavali su vesejem naše zajedniško popodne. Kad u niko doba eto ti i oca. Brž smo ga probudili, oli je odspava pižolot ka svaki pravi spli'ski penzioner, pa s onim poznatin zezajućin moton proviri i reče: „Opaa Mare, doša ti je sin, a jesi li na'ranila malega, je li bidan ča poji?!“ ;) Naravski, svi smo se onda od srca nasmijali, a nas dvoje jedva ga natirali da barenko deset minuti sede s nan. Ma, čoknu je i on, ni moga odolit kozican, iako nikad ono baš otvoreno ni ti priznat materi da je kuvarica par excellence. E, kad je doša štrudel na red, onda je od gušta kusa, a mama je bila prisritna radi nas oboje. Ne mogu nikad zaudobit ni njezine tećice, oliti pršure sa spizon u toj istoj kujni , koje su me čekale, zaštićene pokriviman ka da čuvaju najveću tajnu svita na špaheru, kad bi se ka momak vraća kasno iz grada. Okuse teleće frigane džigerice i jaja na oko potpuno ispečena da ne bude onega, ča smo zvali „slina“ na vrju, posebno pamtin, jerbo san baš to puno puno voli. Kako se ne sitit i pustih prigodnih i inih ručkovi, večeri, pače rojendani, kad je bila istinski sritna da smo svi skupa, brat i ja sa ženan i dicon i naravski, otac i ona. Vodila je računa, unoseći se dušom i srcem, brž za nekoga pretirano, da svakome ugodi i na taj način. Za nju je intimna žeja, pače svetinja bila radost i mir u obiteljima sviju nas. Inšoma, po staremu dobremu običaju, potla smo išli na lođu provitrit glavu i proćirit vanka.

Naravski, obavezno prokomentirat i to kako nan se o pustih kuć napravjenih isprid naše, slabo vidi Šolta, ma ipak bokunić dragega škoja ni se moglo sakrit. Otac se onda vrati u tinel, njegovu „radnu sobu“, a mama za makinju, oli na žensku robu koju je pripremala za mušterije. Uvik san se divi majčinoj stručnosti i maštovitosti u kreacijama, jerbo je i nešesne žene činila da izgledaju boje, ča je bila tradicija ženskog dila njezine obitelji Burica. O tome je godinan svidočila i stara legendarna Singerica, na gornjen podu obitejske kuće u Grohotan. Odlazeći od mojih u kasno popodne prima neboderu di i sad živin, uvik je dil mene ostaja tamo. Znam samo da mi i danas majka strašno nedostaje, a ovakve i slične trenutke, jer život je samo tren, ljubomorno čuvan u svojen srcu!