Željko Bilankov | Naš prvi stan

(dvadesetpeta kratka priča pisana pretežno šoltanskim dijalektom)

Do maloprin je dažilo, a moji su baš ti dan izabrali za selit iz Kninske ulice di smo živili ka sustanari. Kaška na početku uzbrdice na neasfaltiranoj cesti Mažuranićeva šetališta ni spričila barbu Šimu da isprid sebe uporno gura tešku karijolu punu puncatu stvar, za naš prvi stan. Ja trepjen iza njega s nikon boršicon u ruci i znatiželjno gledan kako njezina kola meče raskvašenu zemju, ostavjajući dubok trag. Ma, išporka san i ja postole, ali ča jema veze, kad gremo u ništo novo, ništo naše,..samo naše.

Bi je to smišni dvosobni stan na četvrton podu zgrade koju su zvali „kasarna“, jerbo je sličila na nju, onako duga, s puno ponistri. Jemala je dva portuna s jedne i druge strane i krov od crljenih kup. A ča reć o stanu, koji mi se pari propju lip. S vrat se ulizalo u mali hodnik, a iz njega, desno, u očevu i materinu sobu na sjeveru, po sredini je bi banj, a livo, na jugu, vela kujna s pogledon na moju novu osnovnu skulu, „Zlatu Šegvić“! Uz nju, smistila se moja sobica, u kojoj me dočeka otprin doneseni kauč, pa san se od sriće baci na njega, da su skoro pukle šuste...hahhahaa. Odma san poleti na ponistru i onako vesel poče pivat i mahat nepoznatin judima koji su prolazili ispod kuće, gledajući me ka u čudu. Eee, kako su samo potla moji sredili ti stan. Kogo da je doša u vižite, ni moga sakrit oduševjenje i nahvalit ukus, prvenstveno matere, a onda i oca. Bili su mladi, puni energije i mnogih ideja, a ča su jemali, otac tristitri, a mater tek dvastisedan godin. U svakemu detalju vidi se njezin umitnički dar, ka vrsne šnajderice i mlade žene koja je već onda pratila modu, a bila je ono ča se danas zove stilistica,..i to samo kaka. Jednon je kod nas stiga i očev brat, barba Sreško sa famejon. Posebno je bi svima drag njiov debeljuškasti sin, moj prvi rojak, Goran, uvik nasmijan i pun smišnih izrek. Kad ga je mama upitala jeli mu se sviđa stan i kako je u kujni, isprve je ispali: „Teta Marija, ka u zubariji!“...ohohohhoho. Zapravo, ta njegova duhovitost bila je ustvari točna, jerbo je sve odisalo bilinon i čistoćon. Otac je zna reć, kako je mater infišala u luštravanje, a jopet se i njemu to sviđalo, iako za dišpet ni ti priznat. A koliko je tek kroz nas prošlo Šoltani i ne samo našega roda. Znali su reć: „Marine bogati, di si ovako daleko dobi stan, jedva smo došli sa broda!“

Zapravo, gledajuć danas, koliko se proširi Split, bili smo gotovo u samon centru. Istina, tad je naša kuća bila jedna od zadnjih, cesta još nedovršena, a gori iza nas, na istoku, bila je nika šumica sa voćkan, ka dil velikega spli'skog poja. Ma, tih ranih šezdesetih, ni puno svita jemalo televizor, a ja san bi te sriće da ga je otac moga kupit. Sićan se, kako mi je prva dičja strana serija na Televiziji Zagreb, koju san gleda, bila ameriška „Dennis vragolan“, koja me nasmijavala za poludit. Da ne govorin o našoj Slavici i Mendi ili nezaboravnoj, kultnoj kako bi rekli danas, „Na slovo, na slovo!“. Naravski, malo poza tin, red je doša i na telefon, za mene malega, pravo čudo tehnike od aparata. Prvo san ga ogleda, pipa, pa lagano diza slušalicu, da bi ču ono: „Ti-ti, ti-ti...ti-ti!“, a moji su se podsmihivali kako san oprezan i pomalo strašljiv. Danas san siguran kako su tega dana dogovorili sa jednon njiovon prijatejicon da nas nazove. Otac je š njon progovori tek dvi-tri riči i pruži telefon prima meni, jerbo me je, po njemu, ona tribala. Već in je lebdi osmih na licima, a ja san uvati slušalicu i polako je prini uhu. Ajmeee, kad san joj ču zvonki glas, skoči san ka da mi je ništo probolo glavu, ispusti telefon i uteka u sobu. Kako su se samo moji smijali, a brž i ona sa druge strane žice. Uspili su me pripast, ma bili su uporni da u idućin danima prebrodin ti nepotribni strah. Ipak, jedan drugi događaj ureza mi se u sićanje. Jema san osan godin. Ka da sad vidin, sidili smo za stolon, obidvavali, pojili juhu, a isprid nas bile su lipe frigane materine polpete, pire kumpir i zelena salata, ono ča san puno voli. Gori je tranzistor, a program je prikinula strašna vist, koju onda nisan dobro svaća. Otac je pojača glas na radiju, a materine oči odjednon su se ispunile suzan i ona je bolno zajokala. Ubili su Johna Kennedyja!!! Lako je sad govorit, ka i za sve kad prođe, oliti bit general poslin bitke, ali u ono vrime to je bi pravi šok za cili svit. Amerika se doživjavala ka glavna i nitko ni moga pritpostavit ča će se događat. S druge strane, Kennedy je ka mladi, zgodni prisidnik već ima karizmu, a posebno je bi omiljen meju mnogin ženan, pa je parilo da je sve stalo. Ka da je to bi uvod u druge tužne događaje, koji su me pratili na mojen odrastanju, ali puno bolnije, jerbo se radilo o mojin najbližin. Danas znan, da san uvik uza se ima one koji su me volili i svaki na svoj način pomogli da mi pokažu pravi put i učine sritnin, jerbo bez obzira na neminovnu bol koja nas svih prati, život je nadasve lip!