četvrtak, 17. listopada 2019.

Željko Bilankov | Priko Visa do Italije


(6 priča pisana pretežno šoltanskim dijalektom)

Još se razdanjivalo, kad je njiov brod spasa uplovljava u viški porat. Stisnuti ka' srdele, u stivi bez arje, ustrašeni i satrveni neprestanin vajanjen zbog jakega juga, izmučena skupina Šoltana, meju kojima su bili moji sa očeve i materine strane, napokon je arivala i brod se koštava uz mul. Sa nestrpjivin, ali umornim pogledima prima gori, jedva su čekali da se otvori stiva i onda vanka, na svitlost tega ranega jutra. Mornari partizani, brižno su in pomagali kod silaska na tlo otoka, naročito dici i starijin, a mnogima je to bi prvi odlazak sa Šolte u svit!

Mijun pitanji u svakemu od njih, mijun najlipjih žeja u dočekanoj slobodi, na ovemu daleken škoju...i odma in je lice poprimilo vedrinu, jer se prid njima najednon odnekud stvori očev brat Frane, tad šesnajstogodišnjak... uvik od voje za šalu i justa razvučenih u široki osmih, poleti in je u zagrjaj.., a kako se ne bi radovali, kad nisu znali ča je š njin, jerbo je jednu večer samo nesta. Bi je iša sa  kumon Milanom na kanjce ka' i puno puti dotad, ali ih je zaustavi partizanski patrolni brod, a njega odve u Vis, zato ča in je svaki sposobni mladić bi potriban... in šoma, ipak nisu bili kompletni, jerbo je najstariji brat Sreško, sa nepunih 18 godin, još 1943. otiša u partizane... Barenko je Frane sad tu, a još in je doni i štrucu friškega kruva, koji nisu vidili ko zna otkad. Koja srića, kruv... u ono vrime prava blagodat, eeh. Odma poza tega, smišteni su kod nikih judi, tu u mistu. Vis je tih dan bi pun vojske i svakojakega svita, a bome i prava luka spasa za rike izbjeglica širom Dalmacije. Daleko od svoga doma, puni tuge i nevoje, ali zajedno, dilili su sve ča se moglo, vidili čak i sapun nakon ko zna koliko dan i virovali u boje sutra. Mejuto, sve manje je bilo mista, za te brojne nesritne fameje i pojedince, pa se moralo poć daje. Moji su čuli, zapravo, šuškalo se već niko vrime, da će put Italije, a onda ko zna...inšoma doša je i ti dan...vajalo se jopet ukrcat i bez obzira na jaku neveru, krenut u neizvisnost.

S jedne strane, podivjalo more, s druge strane strah od napada na brode i švapskih plutajućih mina...cilu vičnost traja je ti put,..natiskani, neispavani i uplašeni u mraku stiva jemali su samo sebe i nadu za lipje sutra..., a jemali su i sriću, jerbo su kroz pinu vali i vitra, koji ni sta cilu noć, ugledali svitla njiova novega odredišta, talijanskega grada Barija! Tad nisu mogli ni slutit, da su tek na pola puta, da ih tamo doli, u teploj Africi, čeka pustinja i vrući pisak El Shatta.


Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.